Decenas de persoas concentrouse este mércores ante a sede da Consellería de Sanidade, no barrio compostelán de San Lázaro, para volver reclamar un convenio único para todo o persoal das catro fundacións públicas de investigación sanitaria. Na protesta participaron responsables sindicais de CIG, CSIF, CCOO e UGT, quen rexistraron unha solicitude formal para que lles reciba o conselleiro, Antonio Gómez Caamaño, e non descartan convocar unha folga. En palabras do portavoz da CIG neste conflito, Miguel Tizón, os traballadores destas catro entidades sentense “esquecidos” e “ignorados” por parte da Xunta tras un ano pedindo que se inicie o diálogo para ter ese convenio único.
En concreto, os traballadores afectados correspóndense cas tres fundacións que o 1 de xaneiro de 2024 foron absorbidas por Sanidade (Fundación Biomédica Galicia Sur de Vigo, Fundación Instituto de Investigación Sanitaria de Santiago de Compostela e Fundación de Investigación Biomédica Iibic da Coruña) e cuxos convenios caducaron en 2022, así como coa Fundación Galega de Medicina Xenómica. Os sindicatos reclaman “cousas básicas” como a equiparación das retribucións, a carreira profesional e os trienios. Ademais, no caso do persoal de Medicina Xenómica, que fai actividade totalmente asistencial, “a día de hoxe non negociou nunca” un propio, senón que se adheriu a un que leva “15 anos caducado”.
A XUNTA ESTUDA UNHA VÍA PARA TODAS
A Consellería de Sanidade asegura que “entende a demanda” para negociar un novo convenio e explica que está a traballar coa de Facenda para estudar cal é “o modelo máis idóneo e ofrecer a mellor resposta” ás demandas dos traballadores. Neste sentido, sinala a “dificultade” de contar cun convenio conxunto que afecte tanto as tres fundacións biomédicas como á de Medicina Xenómica, porque esta última é “fundamentalmente asistencial”.
“Isto supón un cambio respecto ao marco negociador anterior, e tamén con respecto ás características dos centros que participen nese convenio único”, subliñan as mesmas fontes. A Consellería de Sanidade cualifica de “prioridade absoluta” a investigación e destaca que, nos seus orzamentos para 2025, hai consignados 23 millóns a este labor, aos que se suman outros 47,4 millóns para as fundacións públicas de investigación e outros 7 millóns para a de Medicina Xenómica.
