O grupo de investigación ‘Virus and Cancer’, do Centro Singular de Investigación en Medicamento Molecular e Enfermidades Crónicas da USC (CiMUS), vén de facer público un avance relevante na loita contra o cancro. A través dun estudo publicado na revista Cell Death and Disease, o equipo identificou un novo mecanismo de regulación da proteína p14ARF, unha molécula implicada na supresión do crecemento tumoral.
Segundo explicou a coordinadora do grupo, Carmen Rivas, este mecanismo baséase na interacción entre p14ARF e unha proteína modificadora denominada SUMO, que permite estabilizar p14ARF nas células e manter a súa acción antitumoral durante máis tempo. Esta proteína actúa como un freo natural ao desenvolvemento de tumores, pero adoita estar en niveis moi baixos en moitos tipos de cancro.
“Identificamos un mecanismo que axuda a estabilizar a proteína p14ARF, cuxa presenza está reducida en moitos tipos de cancro. Isto permite á célula defenderse mellor fronte ao desenvolvemento tumoral”, sinalou Rivas.
O traballo tamén destaca a conexión desta vía molecular cun novo tratamento antitumoral en fase experimental, o Pevonedistat. Segundo os resultados do estudo, o tratamento con este composto activa a ruta de estabilización de p14ARF, incrementando a súa presenza e favorecendo a morte das células cancerosas, polo que o seu uso combinado podería potenciar o efecto terapéutico.
A investigación foi cofinanciada con fondos europeos e contou cunha ampla rede de colaboración entre institucións nacionais e internacionais. Participaron o Centro Nacional de Biotecnoloxía (CNB) e o Instituto de Investigacións Biomédicas Sols-Morreale (IIBM) do CSIC en Madrid, así como o CIC bioGUNE de Bilbao e grupos de Francia e Canadá, o que subliña a dimensión internacional do proxecto e a relevancia dos seus resultados no contexto global da investigación biomédica.
