O sector de Ensino de UXT-Servizos Públicos fará entrega este martes, ás 11,30 horas, no IES de Cacheiras, do 1º Premio de Innovación Educativa, convocado por Escola Viva, ao profesor de Artes Plásticas, Sergio Clavero Ibáñez de Garayo polo proxecto ‘Aturuxo Films. Imaxinando músicas’.
No acto entregaráselle un diploma acreditativo como recoñecemento ao valor innovador dun proxecto pedagóxico cuxo obxectivo fundamental é “o desenvolvemento do pensamento crítico do alumnado a través da creatividade e o fomento dunha mirada atenta e reflexiva para a acción social”. O premio conta cunha dotación económica de 500 euros.
Este galardón ten como obxectivo recoñecer o labor daqueles docentes que levan a cabo experiencias didácticas innovadoras nos seus centros, co fin de mellorar a formación do seu alumnado. O xurado tamén outorgou unha mención honorífica ao proxecto ‘Memoria Innovación educativa’, no ámbito da aprendizaxe participativa e colaborativa, realizado pola profesora Noemia María Ortega Dourado, do IES Carlos Casares.
