Unha colisión frontal entre dous turismos na estrada N-550 ao seu paso pola parroquia de Calo, no concello de Teo, obrigou a intervir esta mañá aos servizos de emerxencia e ás forzas de seguridade. O sinistro tivo lugar arredor das 10:00 e, segundo informou o 112 Galicia, podería deberse a que un dos vehículos invadiu o carril contrario, segundo relatou un dos alertadores.
Tras recibir o aviso, axentes da Policía Local de Teo desprazáronse ata o lugar para comprobar o estado físico dos condutores e avaliar as condicións de seguridade nas que viaxaban, así como para verificar a vixencia dos seus permisos de condución. Tamén se deu aviso á Garda Civil de Tráfico, que participou nas tarefas de control viario, e ao servizo de Emerxencias Sanitarias de Galicia-061, por se fose precisa asistencia médica para os implicados.
A estrada, de gran tránsito entre Santiago e o sur da provincia da Coruña, presentou retencións puntuais durante a intervención dos servizos de emerxencia. Por agora, non transcenderon datos sobre a gravidade das posibles lesións nin se confirmou a existencia de denuncias ou sancións vinculadas ao incidente.
