Todo está preparado en Brión para celebrar hoxe o Día de Santa Minia, coa previsión de que o bo tempo acompañe durante o día grande das festas e na fin de semana. O alcalde, Pablo Lago, expresou a súa satisfacción pola “gran programación deseñada polo equipo de Goberno, o Departamento de Cultura e os traballadores municipais”, que permitirá desfrutar dunhas festas multitudinarias.
Hoxe a avenida de Santa Minia e a contorna da carballeira encheranse de vida con máis de 150 postos de venda de produtos variados como rosquillas, roupa, embutidos, artesanía e filloas. A xornada comezará coa música do grupo de gaitas Airiños do Petouto e a charanga Os Jalácticos, seguidos dunha sesión vermú a cargo da cantante local Ruth Cundíns.
No ámbito dos oficios relixiosos, as misas comezarán ás 9:00 horas e continuarán ata a misa solemne das 13:00 horas. Por razóns de seguridade, as misas e o depósito de candeas realizaranse na casa reitoral, mentres que a capela de Santa Minia permanecerá aberta para que os devotos poidan visitar o sepulcro da santa.
RECEPCIÓN DE AUTORIDADES
Á mesma hora, ás 13:00, terá lugar a recepción oficial de autoridades, encabezada polo alcalde de Brión, Pablo Lago, na carballeira de Santa Minia. Entre as autoridades confirmadas figuran Diego Calvo, conselleiro de Presidencia, Marcos Araújo, xerente da Axencia Galega de Emerxencias, e varios alcaldes de municipios veciños como Ames, Noia e Teo. A comitiva percorrerá a contorna da carballeira antes de asistir á sesión vermú e celebrar un xantar nunha das tradicionais polbeiras.
Pola tarde, a celebración continuará coa actuación da charanga Os Celtas de Negreira e das Escolas de Baile e Música Tradicional de Brión, culminando a xornada cunha verbena protagonizada polas orquestras Marbella e Origen.
