O alcalde de Brión, Pablo Lago Sanmartín, e a deputada responsable de Infraestruturas Viarias e Obras Provinciais da Deputación da Coruña, Mónica Rodríguez Ordóñez, mantiveron unha reunión no municipio para avanzar na planificación da construción dunha senda peonil na DP-1302 Negreira-Urdilde, ao seu paso pola parroquia de Mourentáns. No encontro participaron tamén técnicos municipais e provinciais, que acordaron que o ente provincial presentará no mes de marzo o borrador do proxecto desta actuación, co obxectivo de que poida licitarse e iniciar as obras no menor prazo posible.
Durante a xuntanza confirmouse que o Concello de Brión dispón xa dos terreos necesarios para executar a obra, logo das cesións realizadas polas persoas propietarias ao longo dos últimos meses. O rexedor destacou que se trata dun tramo cun tráfico intenso e cunha falta case total de beiravías, unha situación que, segundo explicou, xa puido comprobar a deputada nunha visita anterior á zona. Nese sentido, agradeceu publicamente a colaboración da veciñanza pola súa disposición a facilitar os terreos precisos para a intervención.
A actuación prevista contempla a execución de beirarrúas ao longo de 950 metros, entre os puntos quilométricos 3+215 e 4+074 da DP-1302, no treito que atravesa a aldea de Mourentáns. O acordo foi avalado polo equipo técnico da Deputación da Coruña, que será o encargado de redactar o proxecto técnico da obra.
Segundo o calendario manexado, nas próximas semanas celebrarase unha nova reunión entre ambas administracións, na que se presentará o borrador do proxecto e se dará a coñecer o orzamento necesario para o seu desenvolvemento. Unha vez completados estes pasos, será a Deputación Provincial quen asuma a redacción definitiva do proxecto e a licitación das obras.
O alcalde de Brión subliñou que se trata dunha actuación longamente demandada, xa que, segundo indicou, o Concello vén reclamando esta intervención desde o ano 2021. Nese contexto, expresou o seu desexo de que o proceso avance definitivamente e trasladou unha mensaxe de desculpa á veciñanza de Mourentáns polo tempo de espera acumulado.
OUTRAS DEMANDAS NA DP-1301
No transcurso da reunión, Pablo Lago tamén trasladou á deputada provincial a necesidade de acometer outras actuacións pendentes na DP-1301 A Gándara-Amañecida, solicitadas en abril de 2024. A primeira delas refírese ao remate das obras de ancheamento no tramo comprendido entre A Luaña e Nináns, un sector que quedou pendente entre dous tramos xa ampliados nos últimos anos.
A segunda petición céntrase na mellora da seguridade viaria entre Liñares e Gronzo, un tramo caracterizado polo seu estreitamento, a presenza de curvas e un elevado volume de tráfico. O alcalde explicou que se trata dunha demanda vinculada á ampliación da ponte de Liñares e que considera necesaria para mellorar a convivencia viaria nun núcleo en crecemento como Gronzo.
A Deputación da Coruña xa realizara unha actuación nesta estrada no ano 2020, cun investimento próximo aos 115.000 euros, destinada á mellora do trazado entre os puntos quilométricos 0,047 e 0,377 da DP-1301. Esa intervención incluíu a ampliación dunha ponte sobre o río Viceso, permitindo unha conexión máis segura co núcleo de Os Ánxeles, onde se concentran servizos e equipamentos básicos do municipio.
