O Concello de Brión, en colaboración coa Escola Galega de Saúde para Cidadáns, impulsa un novo obradoiro de primeiros auxilios na infancia dirixido á veciñanza do municipio. A actividade permitirá que ata 30 persoas adquiran coñecementos básicos e resolvan dúbidas sobre como actuar ante situacións de emerxencia que afecten a menores.
O curso desenvolverase o 9 de febreiro, en horario de 16:00 a 20:00, no centro social polivalente de Brión. A participación será de balde, aínda que require inscrición previa a través da web da Escola Galega de Saúde para Cidadáns.
A sesión será impartida por Carlos Prados Sande, diplomado universitario en Enfermería e profesional da FPUS 061 Galicia, quen explicará os procedementos básicos de actuación ante feridas, hemorraxias, reaccións alérxicas, queimaduras, convulsións e crises epilépticas. O programa inclúe tamén a aprendizaxe de técnicas elementais de reanimación cardiopulmonar (RCP) e manobras para previr atragoamentos, con especial atención aos casos que poden darse na infancia.
A concelleira de Servizos Sociais, Rosa Romero, sinala que a organización deste obradoiro responde á boa acollida doutras accións formativas previas no municipio. Segundo explicou, “este curso xorde despois do éxito acadado o pasado mes de outubro coa formación de reanimación cardiopulmonar, pois é moi importante que todas as persoas aprendamos técnicas de primeiros auxilios para saber como actuar diante de determinadas situacións xa que iso pode axudar a salvar moitas vidas”.
