A sexta edición da Feira Labrega de Brión, inicialmente prevista no Adro da Igrexa dos Ánxeles, celebrarase este domingo 22 de setembro no centro comercial Montebalado, debido ás previsións meteorolóxicas adversas. O evento, que se desenvolverá entre as 11:00 e as 20:00 horas, reunirá máis de 25 postos de venda e exposición de produtos locais como froitas de tempada, queixos, conservas, repostería artesanal e alimentos caseiros, así como artesanía e unha mostra de apeiros agrícolas e de bonsais de José Freire.
Ademais, haberá actividades para toda a familia, incluíndo xogos tradicionais para a rapazada e dúas degustacións. Ás 12:00 horas, o chef José Manuel Mallón ofrecerá un showcooking con petiscos elaborados con Tenreira Galega e produtos das hortas locais, mentres que ás 18:00 horas será a quenda de Manu Rey, que presentará outra degustación con ingredientes da zona. Ambas as actividades contan co apoio do GDR Terras de Compostela.
A xornada estará animada coa actuación do grupo de baile tradicional das escolas municipais de Brión ás 13:00 horas e co espectáculo “Supercoroza. Na eira e na lareira” ás 17:00 horas. A feira está organizada polo Concello de Brión, en colaboración con diversas institucións e entidades como a asociación Daquí Darredor, o GDR Terras de Compostela e Turismo de Galicia.
