O presidente do Partido Popular de Santiago, Borja Verea, comprometeuse este martes a mellorar as retribucións e as condicións de traballo das profesionais do Servizo de Axuda no Fogar (SAF) no caso de acceder á Alcaldía. O dirixente popular asegurou que a súa proposta non pasa por asumir directamente a xestión municipal deste servizo, senón por introducir cambios que permitan mellorar a situación das empregadas encargadas da atención domiciliaria a persoas maiores e dependentes.
Verea explicou que xa trasladara esta postura ás representantes do colectivo e defendeu que se trata dun compromiso diferente ao adquirido polo BNG e Compostela Aberta antes das eleccións municipais de 2023. “Eu fun claro con elas. Díxenlles que non iamos municipalizar o servizo, pero si que iamos mellorar as súas condicións económicas e laborais”, manifestou.
Neste sentido, o líder do PP acusou as dúas formacións que integran o Executivo compostelán de non avanzar na municipalización do SAF, unha medida que, segundo sostén, defenderan durante a anterior campaña electoral. Verea cuestionou que, transcorridos tres anos desde aqueles compromisos, non se materializasen cambios neste sentido. “Non moveron un só dedo para intentar municipalizar estas traballadoras. Mentíronlles na cara hai tres anos”, afirmou.
Unha das principais críticas do representante popular céntrase na situación económica das traballadoras, sobre a que denunciou diferentes incumprimentos. Segundo expuxo, as profesionais chegaron a quedar sen percibir unha mensualidade, algo que cualificou como un feito sen precedentes na historia do servizo en Santiago. Ademais, asegurou que seguen pendentes de pagamento a paga extraordinaria correspondente ao verán e os gastos de quilometraxederivados dos seus desprazamentos laborais.
Para Verea, estes problemas evidencian a necesidade de revisar as condicións nas que se presta a atención domiciliaria na capital galega. O presidente dos populares describiu a situación das empregadas como “tercermundista” e reclamou que se garantan unhas condicións económicas e laborais acordes coa responsabilidade que asumen diariamente.
Máis alá das reivindicacións do persoal, Verea puxo o foco nas persoas maiores e dependentes que reciben atención nos seus domicilios, así como nas familias que precisan deste recurso municipal para garantir os seus coidados. O popular lembrou que o servizo está prestado maioritariamente por mulleres e que o seu traballo permite atender necesidades básicas de persoas que non sempre dispoñen dunha rede familiar capaz de asumir esas tarefas.
O dirixente popular considerou que os problemas denunciados non afectan exclusivamente ás profesionais, senón que tamén comprometen a prestación dun recurso utilizado por centos de familias compostelás. Neste contexto, criticou a xestión do Executivo municipal e acusouno de presentar o SAF como un exemplo da súa política social mentres, ao seu xuízo, se deterioran as condicións nas que funciona.
“Que este goberno levase tres anos sacando peito deste servizo cando o está deixando practicamente desmantelado, nunha situación terceiromundista, é unha falta de respecto xa non só ás propias traballadoras, senón tamén a todas estas familias, a todos estes dependentes, a todos estes maiores e a todos os santiagueses”, declarou.
Finalmente, Verea reiterou que a mellora das condicións laborais e salariais do persoal do SAF formará parte dos seus compromisos de goberno, aínda que descartou recorrer á municipalización. O presidente do PP compostelán insistiu en que a atención ás persoas dependentes debe contar cos recursos necesarios para garantir tanto os dereitos das traballadoras como a continuidade e a calidade do servizo que reciben os usuarios.
