Os Reis Magos de Oriente visitaron durante a mañá deste día as parroquias da chamada parte alta de Brión, con paradas en Cornanda, Luaña, Viceso, Ons e Boullón, ademais de achegarse á residencia de maiores Servisenior Brióne ao grupo de nenas e nenos que participa no programa Concilia Nadal Brión. A xornada desenvolveuse con normalidade e cunha notable presenza de familias nos distintos puntos do percorrido.
Como vén sendo habitual, Melchor, Gaspar e Baltasar desprazáronse nun autobús de época, acompañados polo alcalde, Pablo Lago, xunto ás concelleiras de Cultura, Sandy Cebral, e de Servizos Sociais, Rosa Romero, así como polo concelleiro de Obras, Antonio Vidal. A comitiva foi recibida nos locais sociais das parroquias, onde os Reis atenderon individualmente ás crianzas e escoitaron as súas peticións.
A diferenza doutras edicións, o tempo favorable permitiu que, mentres se desenvolvían as recepcións no interior, no exterior se organizaran xogos e se repartise unha bolsa de lambonadas entre a rapazada. Ademais, tanto menores como persoas adultas participaron nunha degustación gratuíta de roscón de reis e chocolate con churros, que acompañou as visitas en varias das paradas.
A programación continuou pola tarde con novas visitas previstas no adro da igrexa de Bastavales, na contorna da igrexa de San Salvador, no campo da feira de San Ramón (O Tremo), no adro da igrexa dos Ánxeles e na Carballeira de Santa Minia, completando así o percorrido das Súas Maxestades polo conxunto do municipio.
