O Club de Patinaxe Artística Brión, con sede no concello de Brión, participou o pasado sábado 12 de abril no Campionato de España, celebrado na localidade catalana de Reus, acadando resultados destacados fronte aos mellores conxuntos do panorama nacional.
O club brionés acudiu á cita estatal con dúas formacións: o Grupo de Show Pequeño, que presentou a coreografía Memento Mori e conseguiu un 6º posto entre 22 equipos participantes; e o Cuarteto Sénior, que interpretou Letal e alcanzou a 9ª posición nunha categoría con 21 grupos. Ambas actuacións foron valoradas polos xuíces entre grupos que inclúen aos actuais campións e subcampións de Europa e do mundo, o que dá mostra da relevancia da competición.
As doce patinadoras do club —Icía, Paula A., Antía, Yaisa, Leire, Flavia, Paula M., Carla, Greta, Alba, Zaira e Marta— valoraron de maneira moi positiva a súa participación, tanto polo nivel competitivo como pola experiencia vivida. Agora, tras o seu regreso a Galicia, comezan xa os adestramentos coa vista posta na súa próxima cita: a Copa de España, que se celebrará os días 25 e 26 de abril en Alcoy (Alacant).
O equipo técnico, formado por Natis e Andrea, destacou o compromiso e evolución das súas patinadoras ao longo das últimas tempadas. “É un orgullo poder competir por terceiro ano consecutivo tanto no Campionato como na Copa de España”, manifestaron.
