Este domingo, o Pico Sacro foi o escenario da emocionante Cerimonia do Lume Sagrado, un evento que non se celebraba desde hai catro anos debido á pandemia e ás adversas condicións meteorolóxicas dos últimos anos. Este ano, afortunadamente, o bo tempo permitiu que a cerimonia se desenvolvese con total esplendor, atraindo a preto de medio cento de participantes entre membros da Asociación da Fervenza do Castro de Callobre (A Estrada), visitantes ataviados a modo e músicos do grupo folclórico local Son de Gaita (Sergude).
O ritual, que ten as súas raíces nos antigos ritos celtas do Solsticio de Verán, iniciouse ao pé do Pico Sacro, onde o séquito da Raíña Alda se xuntou para ascender xuntos á Capela de San Sebastián. Alí, diante da ermida, o Druída, utilizando un bastón con lupa incorporada, focalizou a luz solar sobre a ramaxe seca para xerar o Lume Sagrado. Este lume foi utilizado para acender as candeas que os participantes, incluída a Raíña Alda, levaban consigo.
As chamas non só simbolizaron a renovación e purificación asociadas ao solsticio, senón que tamén foron compartidas coa comunidade, xa que os veciños e veciñas de Boqueixón que asistiron ao evento leváronse o lume para as tradicionais cacharelas de San Xoán.
O alcalde de Boqueixón, Ovidio Rodeiro, e o concelleiro de Turismo, José Luís Mareque, destacaron a importancia deste evento para a cultura local e agradeceron á Asociación da Fervenza do Castro de Callobre por súa colaboración no programa “Un mes e Pico”. Ademais, animaron aos asistentes a explorar máis profundamente o Pico Sacro a través das baixadas espeleolóxicas programadas ata setembro, destacando a rica historia do lugar como sitio de coronación de reis visigodos e súa importancia relixiosa pre e post-cristiá.
