A voceira do goberno municipal, Míriam Louzao, anunciou esta mañá que a Xunta de Goberno deu luz verde á ampliación de 10 meses no prazo de execución do contrato da oficina técnica do Concurso Internacional de Iluminación Artística e Ornamental da contorna monumental da Catedral de Santiago. A nova data de finalización será o 12 de xuño de 2026, debido a atrasos nos trámites administrativos previos ao lanzamento do certame.
Segundo Louzao, este concurso “está concibido como un certame pioneiro no ámbito do deseño lumínico urbano e patrimonial” e conta cun xurado internacional con figuras como o arquitecto David Chipperfield, a arquitecta Teresa Táboas, o historiador da arte Manuel Antonio Castiñeiras, o deseñador lumínico Roger Narboni e a editora Esther Torelló. A fase de recepción de proxectos está aberta ata o 19 de agosto, tras a que se escollerán seis finalistas que recibirán accésits de 15.000 euros para elaborar os seus anteproxectos técnicos. O gañador percibirá 100.000 euros e executará de forma piloto a súa proposta na Praza de Praterías.
No capítulo de contratación, a Xunta de Goberno aprobou o inicio do expediente para a dirección facultativa, coordinación de seguridade e saúde, seguimento arqueolóxico e control de calidade das obras de ampliación da rede de abastecemento aos lugares de Agualada e A Torre, en Marantes, cun orzamento de licitación de 51.635 euros e un prazo de execución de cinco meses. Tamén se autorizou a nova licitación das obras de reposición da estanqueidade na cuberta posterior do polideportivo do CEIP Pío XII, cun orzamento revisado de 99.494 euros, despois de que a primeira licitación quedase deserta en maio.
Ademais, concedéronse dúas licenzas urbanísticas: unha para a construción dunha vivenda unifamiliar na rúa de Sar e outra para a división dunha vivenda existente en dúas na rúa da Choupana.
No apartado de subvencións e convenios, aprobouse unha achega de 60.000 euros á Federación de Asociacións de Familiares e Persoas con Enfermidade Mental de Galicia (FEAFES Galicia) para programas de atención a persoas con enfermidade mental e en risco de exclusión; 27.000 euros á Fundación Secretariado Gitano para o programa de inclusión Promociona; 5.000 euros ao Club Victoria e 65.000 euros á Sociedade Deportiva Compostela.
