O vindeiro 12 de outubro, a localidade de Aldea Nova, en Ames, será o escenario da primeira edición do Cros Concello de Ames, que á súa vez será o Campionato Galego de Campo a Través Absoluto por Remudas Mixtas. O evento, organizado polo Concello de Ames en colaboración coa Federación Galega de Atletismo, acollerá atletas federados e non federados, e contará con probas para todas as idades.
Durante a presentación do evento, o alcalde de Ames, Blas García, destacou que o cros cumpre co obxectivo de “dispoñer dun circuíto de cross no concello”, sinalando que a súa ubicación en Aldea Nova, preto de Bertamiráns, permite contar cun espazo amplo e accesible. Engadiu que o concello continúa a apostar polo deporte creando novas probas e circuítos.
A concelleira de Deportes, Susana Señorís, explicou que esta primeira edición permitirá tanto aos veciños como aos atletas federados participar, agardando unha alta participación e boas condicións climatolóxicas. O presidente da Federación Galega de Atletismo, Iván Sanmartín, resaltou a importancia do evento, especialmente o Campionato Galego de Remudas Mixtas, que contará cunha maior participación e nivel que en edicións anteriores.
As probas escolares, dirixidas a categorías de sub10 a sub18, comezarán ás 11:00 horas, mentres que a proba de remudas mixtas terá lugar ao final da xornada. As inscricións para o campionato están abertas ata o 7 de outubro para equipos federados, e ata o 9 de outubro para as categorías populares.
