O pasado venres, 27 de setembro, celebrouse no Milladoiro a sexta edición do Día do Deporte, unha iniciativa organizada pola Concellería de Deportes de Ames co obxectivo de promover o deporte e a actividade física entre a veciñanza. O evento, que contou coa colaboración da Deputación da Coruña, converteuse nunha cita destacada do mes de setembro, ofrecendo unha ampla variedade de deportes para que os asistentes poidan descubrir e escoller a súa disciplina favorita.
Durante as tres horas e media que durou a xornada, a área deportiva do Milladoiro acolleu actividades dirixidas como aerozumba, spinning e baile moderno, ademais de deportes como piragüismo, atletismo, xadrez, baloncesto, balonmán, fútbol sala, tenis, ximnasia rítmica, patinaxe, judo e taekwondo. A iniciativa tamén contou con inchables para os máis pequenos, creando un espazo lúdico para toda a familia.
Os participantes que se animaron a probar seis ou máis actividades puideron acumular selos, que lles permitiron recibir un agasallo como recoñecemento á súa participación activa no evento.
A concelleira de Deportes, Susana Señorís, subliñou a importancia deste tipo de iniciativas para fomentar un estilo de vida saudable entre a poboación. ‘Buscamos poñer en valor a importancia de manterse activos, non só para mellorar a forma física, senón tamén para previr enfermidades e incrementar a autoestima e o optimismo’, destacou Señorís, resaltando o impacto positivo que o deporte pode ter na calidade de vida das persoas.
