A Concellaría de Deportes e Promoción da Saúde de Ames retoma o seu programa de andainas saudables cunha nova proposta para o vindeiro sábado, 28 de setembro. Os participantes percorrerán a oitava etapa do Camiño de Santiago desde o Barbanza, nun tramo de 15 quilómetros que se inicia no Lugar de Tallós, en Dodro, e conclúe na Picaraña.
Aquelas persoas interesadas en participar poden inscribirse ata o xoves 26 de setembro ás 14:00 horas, completando o formulario dispoñible en liña. Para facilitar o traslado, haberá un servizo de autobuses con saída desde a praza do Concello en Bertamiráns ás 9:00 horas e desde a Casa da Cultura do Milladoiro ás 9:15 horas.
Este percorrido forma parte do Camiño de Santiago desde o Barbanza, ‘A orixe’, unha ruta de 120 quilómetros que parte do Faro de Corrubedo e percorre localidades costeiras da ría de Arousa, como Ribeira, Boiro e Rianxo, antes de unirse ao Camiño Portugués en Padrón. A andaina anterior, celebrada en xuño, completou o tramo entre Santa María de Leiro en Rianxo e o Lugar de Tallós, en Dodro.
Hai dispoñibles 70 prazas, e as persoas empadroadas en Ames terán prioridade de inscrición. Recoméndase levar roupa e calzado adecuados para a camiñada.
