A veciñanza de Ames, que o pasado domingo 8 de setembro se manifestou para denunciar o incumprimento da lei de benestar animal, acusa ao Concello de amosar un “menosprezo” cara á súa causa e de ignorar as súas demandas. Tras as publicacións en redes sociais do concelleiro de Medio Ambiente, Javier Antelo, nas que minimizaba a protesta, os manifestantes reiteraron que a súa loita está baseada en defender os dereitos dos animais e no cumprimento da lei vixente, sen ningún interese político.
Nun comunicado, as promotoras da mobilización lamentan as declaracións de Antelo, quen afirmou que as manifestacións estaban “practicamente baleiras” e que as demandas non eran máis que unha “malinterpretación” da nova normativa. O colectivo denuncia que esta actitude “ridiculiza e ningunea” ás persoas que promoven a defensa dos animais, amosando falta de respecto e empatía.
Os veciños de Ames sinalan que, desde hai anos, están a sufragar de maneira particular os custes da atención ás colonias felinas, e que o que solicitan é o apoio do Concello para protexer os animais e as persoas que os coidan. Aseguran que existen fondos europeos, estatais e autonómicos destinados a este fin, e que a súa proposta non busca dilapidar recursos públicos.
Entre as principais reivindicacións presentadas figuran a creación dun servizo de lacería 24 horas, un rexistro das colonias felinas e das coidadoras, a aplicación do método CER (captura, esterilización e retorno) en todo o concello, e a implementación dun protocolo formal de recollida de animais abandonados. Tamén reclaman convenios con veterinarios locais, campañas de concienciación, e claridade sobre o uso dos fondos dispoñibles para o cumprimento da lei de benestar animal.
Por outra banda, o colectivo destaca que en Ames, cunha poboación de 32.000 habitantes, hai máis de 10.000 animais de compañía, segundo datos do INE, polo que consideran que o Concello debe asumir as súas responsabilidades nesta materia.
Finalmente, a veciñanza reitera o seu desexo de colaborar co departamento de benestar animal para traballar xuntos e facer de Ames un exemplo de protección animal.
