Do 16 ao 22 de setembro, a Rede Provincial de Coworking da Deputación da Coruña celebrará a primeira edición do Rede Coworking Fest 2024, un evento centrado en promover a innovación, colaboración e cultura emprendedora. Dentro desta iniciativa, o espazo colaborativo A Proa, situado no parque empresarial do Milladoiro, organizará dúas actividades principais: un encontro de emprendemento feminino o mércores 18 de setembro e un obradoiro de mentalidade e vendas o xoves 19 de setembro.
A concelleira de Promoción Económica e Innovación, Ana Belén Paz, subliñou que o obxectivo deste evento é “promover a creación de sinerxías entre emprendedores, freelancers e pequenas empresas” e dar a coñecer a importancia dos espazos de coworking como motores da economía local.
O encontro de emprendemento feminino, que terá lugar o 18 de setembro, busca visibilizar o impacto do emprendemento feminino e fomentar a colaboración entre mulleres. Pola súa banda, o obradoiro de mentalidade e vendas, programado para o 19 de setembro, axudará aos participantes a mellorar a súa estratexia de vendas, abordando desafíos comúns e aprendendo a xestionar obxeccións dos clientes.
A semana ofrecerá unha ampla variedade de obradoiros, charlas e actividades culturais en diferentes espazos de coworking da provincia, favorecendo o networking e o crecemento empresarial.
