O Concello de Ames anunciou que, dende o inicio do actual mandato en xuño de 2023, adxudicou obras por valor de 6.987.790,70 euros, un investimento que inclúe un total de 53 proxectos. Estes abarcan áreas como a pavimentación de viarios, a mellora da seguridade viaria, o abastecemento e saneamento, así como a instalación de parques infantís e a mellora das infraestruturas deportivas.
O alcalde de Ames, Blas García, destacou o esforzo inversor realizado polo Concello, facendo especial fincapé en que o 57 % das obras foron executadas no rural. García subliñou que “xa acadamos a cifra de 7 millóns de euros en contratos adxudicados, dos cales unha boa parte redundan na mellora do rural amesán”.
Entre os proxectos máis salientables, atópanse a ampliación da rede de saneamento en Caroubáns, o campo de fútbol de Ortoño e a creación dun novo campo de atletismo en Ventín. Tamén se levaron a cabo melloras de viarios e pavimentacións en áreas como O Lombao, o Milladoiro, Bertamiráns e outras localidades do concello.
Por outra banda, o concelleiro de Obras e Servizos Básicos, Gustavo Nieto, indicou que os traballos buscan “mellorar a seguridade viaria, o mantemento dos viarios municipais e ampliar o abastecemento e saneamento”.
Actualmente, o Concello ten en proceso de licitación seis proxectos máis por un valor de 715.720,79 euros, centrados en melloras de mobilidade e viarios en zonas como o polígono industrial Novo Milladoiro e varias rúas de Bertamiráns e o Milladoiro.
