O Concello de Ames vén de dar a coñecer a programación infantil que se desenvolverá no marco do proxecto Apego durante os meses de setembro, outubro, novembro e decembro de 2024. A oferta inclúe unha ampla variedade de actividades gratuítas que van desde xogos e contos ata espectáculos musicais, teatrais, maxia e cinema. O obxectivo desta programación é proporcionar ás familias de Ames recursos para unha crianza positiva, natural e creativa.
A programación arranca esta semana coas ‘Brincadeiras miúdas’ de Cé Orquestra Pantasma e a cooperativa Miudiño, que terán lugar o mércores 4 de setembro no parque do Ameneiral de Bertamiráns e o xoves 5 na carballeira de Ventín, no Milladoiro. Estes eventos, que comezarán ás 18:00 horas, serán de balde e non precisan inscrición previa. As familias poderán disfrutar de música, xogos tradicionais e obradoiros de creación de xoguetes con materiais naturais.
A presentación da programación celebrouse no Pazo da Peregrina de Bertamiráns, coa presenza de Blas García, alcalde e concelleiro de Normalización Lingüística e Cultura, Raquel Barbeito, do Servizo de Normalización Lingüística, e María Vázquez, técnica de Cultura. Raquel Barbeito destacou que as “Brincadeiras miúdas” son unha oportunidade para que as crianzas desenvolvan a súa creatividade e autonomía, aproveitando a natureza como espazo de xogo.
Entre as actividades programadas para os próximos meses, cabe destacar a celebración do Festival de Maxia de Ames ‘Festimax’, que alcanzará a súa décimo novena edición a finais de outubro, así como o Festival Cinema Miúdo, que terá lugar en novembro nas Casas da Cultura do Milladoiro e de Bertamiráns. Ademais, en decembro, a programación culminará coa tradicional visita do Apalpador ao Pazo da Peregrina.
O alcalde Blas García subliñou que a deste segundo semestre é “unha programación moi variada, que inclúe tanto a artistas consolidados como a novas promesas, ademais de actividades xa consolidadas como o Cinema Miúdo e o Festival de Maxia“. Con esta programación, o Concello de Ames continúa a súa aposta por ofrecer actividades culturais e educativas que fomenten a participación das familias e o desenvolvemento integral das crianzas no municipio.
