Este xoves, 29 de agosto, a praia fluvial de Tapia acollerá a sétima e derradeira xornada dos Seráns de Ames, unha iniciativa cultural que se desenvolveu durante os meses de xullo e agosto en distintas parroquias do concello. O encargado de pechar o ciclo será o cantautor e monologuista Manolo Boquete, quen ofrecerá un espectáculo que mestura música, contos e humor a partir das 19:00 horas.
Manolo Boquete, coñecido polo seu estilo desenfadado e pola súa capacidade para interpelar ao público, promete un peche de programación cheo de risas e boa música. Ao longo do seu espectáculo, Boquete implicará ao público, creando un ambiente participativo e divertido, fiel ao espírito dos Seráns de Ames.
SERÁNS DE AMES 20
Os Seráns de Ames son unha programación de verán que celebra a súa cuarta edición, consolidándose como unha das citas culturais máis esperadas no concello. Esta iniciativa comezou no ano 2021 na praia fluvial de Tapia e, desde entón, non deixou de medrar. Este ano, ademais de Tapia, as parroquias de Bugallido, Biduído e Agrón tamén acolleron actividades dentro do programa, sumando un total de sete xornadas.
Ao longo do verán, o público puido gozar dun amplo abanico de propostas culturais, desde o pregón inaugural a cargo da xornalista e escritora amesá Paula Señarís ata as actuacións de grupos como Maianas, SR. Salvaje e Banda de Nash. Ademais, os máis pequenos disfrutaron coa foliada de Pablo Díaz e Olga Kirk e cos espectáculos “A vida tola de Pajarito” e “Varietés do Animalario”.
Con esta última actuación de Manolo Boquete, os Seráns de Ames despídense ata o ano que vén, reafirmando o seu compromiso coa cultura e coa creación de espazos de lecer para todos os públicos.
