O Concello de Ames recibiu unha axuda de 1.131.309,77 euros do Ministerio para a Transición Ecolóxica e o Reto Demográfico para desenvolver o proxecto ‘Ames Digital Water‘. Este proxecto ten como obxectivo mellorar a eficiencia do ciclo urbano da auga mediante a dixitalización e a modernización das infraestruturas hídricas no municipio.
A axuda concedida abrangue o 75,43% do orzamento total previsto para o proxecto, que ascende a 1.499.727,83 euros. O restante 24,57% será cuberto con fundos municipais. O alcalde de Ames, Blas García, destacou que este proxecto permitirá “abracar o ciclo da auga na súa totalidade” e “modernizar a rede e mellorar a comunicación e participación da veciñanza”.
O proxecto ‘Ames Digital Water’, que se iniciou en xaneiro de 2024 e ten unha duración estimada de 30 meses, pretende posicionar a Ames como un referente na xestión de recursos hídricos mediante a transformación dixital. García resaltou que a subvención representa un “grande impulso” para a nova empresa municipal e contribuirá á mellora da calidade de vida da cidadanía e á sostibilidade ambiental.
Os obxectivos do proxecto inclúen a dixitalización de infraestruturas hidráulicas, a promoción da participación cidadá a través de plataformas dixitais, e a optimización do uso da auga. Tamén se contemplan programas de formación para o persoal municipal e a cidadanía e a gobernanza colaborativa con entidades supramunicipais.
Entre as actuacións previstas, destacan a planificación de medidas contra emerxencias e a mellora de eficiencia mediante a dixitalización de sistemas de abastecemento e saneamento. Ademais, melloraranse os portais web e desenvolveranse ferramentas dixitais para a xestión das infraestruturas.
Ames foi seleccionada entre as cinco propostas galegas beneficiarias do programa PERTE (Plan de Recuperación, Transformación e Resiliencia) para a mellora do ciclo urbano da auga, cunha puntuación de 74 puntos. Outras propostas galegas seleccionadas inclúen Servizos Urbanos Municipais de Arteixo SA e a Agrupación de Concellos de A Cañiza, entre outros.
O proxecto pretende establecer un modelo de xestión da auga que poida ser replicado en contornos semiurbanos con retos similares, mellorando a gobernanza e a sustentabilidade a nivel local.
