O espazo colaborativo A Proa, situado no parque empresarial Novo Milladoiro, vén de anunciar a súa programación de actividades para o mes de febreiro, cun conxunto de propostas centradas na aprendizaxe práctica, a creación de redes profesionais e o intercambio de coñecemento entre persoas autónomas, emprendedoras e empresas da contorna. Todas as actividades serán de acceso libre e gratuíto, previa inscrición a través da páxina web do propio espazo.
A concelleira de Promoción Económica, Ana Belén Paz, explicou que durante este mes se desenvolverán catro actividades, dúas delas de carácter formativo, xunto cunha nova sesión de networking e a gravación dun podcast. Segundo indicou, estas accións buscan reforzar o papel de A Proa como punto de encontro para o tecido emprendedor e empresarial da comarca.
A programación arrincará o 19 de febreiro ás 10:00 cunha sesión formativa titulada ‘Como solicitar axudas públicas’, impartida por David López Bao. Trátase dunha actividade práctica na que as persoas asistentes aprenderán a localizar, interpretar e tramitar axudas públicas, coñecendo os pasos necesarios para preparar a documentación, presentar solicitudes e realizar un seguimento adecuado, así como evitar erros frecuentes nestes procedementos.
Esta formación está dirixida a persoas emprendedoras, autónomas e proxectos en fase inicial ou de consolidación que desexen gañar autonomía na xestión deste tipo de trámites administrativos, abordando o proceso completo desde unha perspectiva aplicada.
A segunda das accións formativas terá lugar o 26 de febreiro ás 10:00, baixo o título ‘Automatización intelixente para persoas autónomas e emprendedoras’, e será impartida por Juan Diego Pereiro Areán. Neste curso práctico introducirase ás persoas participantes na automatización de procesos sen necesidade de programación, traballando con exemplos reais pensados para ser aplicados de inmediato na actividade profesional diaria.
Ademais das formacións, o espazo colaborativo acollerá ese mesmo día, 26 de febreiro ás 12:30, a gravación do podcast ‘En beta permanente – Edición A Proa’, que contará coa participación da influencer galega Marina Ramos, coñecida nas redes sociais como @wonderintravel. A actividade forma parte da aposta do espazo por xerar contidos vinculados ao emprendemento, a creatividade e as experiencias profesionais.
A programación completarase cunha nova sesión de networking titulada ‘Talento, tripulación e comunidade’, prevista tamén para o 26 de febreiro ás 12:00. Este encontro reunirá coworkers actuais e antigos membros de A Proa co obxectivo de retomar o contacto, compartir experiencias e abrir novas oportunidades de colaboración entre profesionais de distintos sectores, fortalecendo así a comunidade arredor do espazo de coworking.
As persoas interesadas en participar nalgunha destas actividades poden formalizar a inscrición de maneira gratuíta a través da web de A Proa.
