A Real Academia Galega e o Concello de Ames colaboran na cuarta edición da iniciativa ‘Modo galego, actívao!’, un programa dirixido a fomentar o uso da lingua galega entre o alumnado de educación infantil e primaria do municipio. A proposta abrangue este curso a uns 2.700 nenos e nenas dos 11 centros públicos de Ames.
A actividade arrancou tras a celebración do Día de Reis e prolongarase ata este venres, 6 de febreiro, coa implicación de arredor de 300 docentes e máis de 200 profesionais da educación non formal, segundo trasladou o consistorio. O programa propón unha aproximación global ao uso do idioma, promovendo que o galego estea presente durante o maior tempo posible en todas as situacións do día a día.
Neste sentido, o Concello subliñou que a iniciativa non se limita ao ámbito estritamente académico, senón que inclúe tamén espazos como o comedor escolar, as actividades extraescolares e mesmo o entorno familiar, co obxectivo de reforzar a presenza da lingua propia fóra da aula.
Desde os centros participantes destácase o impacto da iniciativa no alumnado. Luís Dobarro, responsable do CEIP de Ventín, un dos colexios incluídos no programa, sinalou que ‘Modo galego, actívao!’ “motiva aos nenos e nenas a asumir con aprecio o desafío de expresarse en galego” e apuntou que durante estes días “escóitase moito nas aulas, nos corredores ou no patio”.
A administración municipal salientou tamén o carácter integral do proxecto, ao contar coa participación simultánea de todos os centros educativos do concello, unha estratexia orientada a “animar a romper a falar a lingua propia” e a facer fronte á perda do 10% de galegofalantes iniciais detectada nos últimos anos.
Por outra banda, o Concello de Ames destacou que a Real Academia Galega traballa xa na extensión do programa a outros municipios galegos, entre os que se atopan Pontevedra, Carballo ou Rois. Ademais, puxo en valor a implicación da RAG noutras iniciativas de ámbito tecnolóxico, como a doazón de voces en galego ao ‘Proxecto Nós’, unha liña de traballo orientada a mellorar a presenza do idioma no ámbito dixital e favorecer a súa incorporación no desenvolvemento de aplicacións baseadas na Intelixencia Artificial.
