O Concello de Ames organiza este mércores 31 de decembro unha gran festa de fin de ano para celebrar a chegada do 2026 sen saír do municipio. A iniciativa, presentada como unha das principais novidades da programación municipal de Nadal, busca ofrecer á veciñanza unha alternativa de ocio nocturno no propio concello, cunha proposta centralizada no Pavillón Polideportivo de Bertamiráns.
A celebración desenvolverase en horario de 01:00 a 08:00, estará dirixida a maiores de 18 anos e contará cunha participación máxima de 870 persoas. As entradas inclúen dúas consumicións, servizo de roupeiro no interior do recinto e transporte de ida e volta en autobús. A oferta complétase cun servizo de barra xestionado por establecementos hostaleiros do municipio —StreetGarden, Asador Vacavella e O Transistor— e coa música a cargo dos DJs da discoteca móbil CDC.
Baixo o lema ‘Este 31 de decembro queda no teu concello… Fin de Ano en Ames!’, o Concello aposta por facilitar a mobilidade da veciñanza con dúas liñas fixas de autobús. A primeira partirá de O Milladoiro, con paradas intermedias en Biduído, Bugallido, Ortoño e chegada a Bertamiráns, con dúas frecuencias de saída ás 01:00 e ás 02:00. A segunda liña percorrerá distintos puntos do rural amesán, con saída desde Agrón e paradas en Portanxil, Trasmonte, Oca, Seares, Barouta, Outeiro, Augapesada, Pousada e Aldea Nova, iniciándose tamén ás 01:00.
O regreso en autobús desde o pavillón de Bertamiráns está previsto con saídas ás 05:00, 07:00 e 08:00, co obxectivo de garantir unha volta escalonada e segura. Con esta proposta, o Concello de Ames incorpora unha celebración centralizada de fin de ano á súa axenda de Nadal, reforzando a oferta local de lecer nocturno e o acceso desde distintos núcleos do municipio.
