O Concello de Ames anunciou que Beatriz Martínez Domínguez será a nova responsable das áreas de Educación, Mocidade e Mobilidade, tras a renuncia da concelleira Carmen Porto Rey, quen deixa o cargo por “motivos estritamente persoais”. A súa toma de posesión terá lugar no pleno ordinario do xoves 27 de novembro.
Martínez, licenciada en Empresariais, conta cunha ampla traxectoria ligada á administración local. Durante sete anos dirixiu un centro de estudos en Ourense e foi presidenta da ANPA do IES do Milladoiro entre 2016 e 2019. No mandato municipal 2019–2023 xa exerceu como concelleira de Mobilidade, Tráfico e Transporte, polo que regresa a unha área que coñece de primeira man. Na actualidade desempeñaba tarefas administrativas no Gabinete de Alcaldía.
Segundo o Goberno municipal, a incorporación de Beatriz Martínez “garante continuidade e solvencia na xestión local”, reforzando así o equipo que lidera o alcalde Blas García, mentres Víctor Manuel Fernández Prieto continuará ao fronte de Urbanismo, Administración Xeral, Persoal e Seguridade.
No vindeiro pleno tamén se formalizará a despedida de Carmen Porto Rey, quen agradeceu a confianza recibida e subliñou que deixa o posto pola imposibilidade de manter a dedicación necesaria. O alcalde amesán quixo recoñecer “a dedicación e perseveranza demostrada á fronte das áreas que xestionou, sacando adiante reformas de gran calado”, e desexoulle o mellor na nova etapa persoal que emprende.
