O Concello de Ames celebrará este xoves, 30 de outubro, o pleno ordinario correspondente ao mes de outubro, no que se abordarán cuestións económicas, fiscais e de xestión municipal, ademais de dúas mocións políticas do grupo popular. A sesión será emitida en directo a través da canle de YouTube do Concello.
O suplemento de crédito 3/2025, por un importe total de 3.163.636 euros, será un dos principais puntos da orde do día. A operación financiarase con remanente de tesourería para gastos xerais e permitirá cubrir necesidades orzamentarias relacionadas co funcionamento ordinario dos servizos municipais. Entre os conceptos máis destacados figuran o incremento do 25% no complemento específico do persoal municipal, que supón 231.017 euros, e o reforzo de partidas para servizos de recollida e tratamento de lixo (1,79 millóns), educación (437.000 euros), gasto corrente (479.000 euros) e investimentos (223.000 euros).
Outro punto relevante será a aprobación inicial da nova ordenanza fiscal da taxa polo servizo de recollida, transporte e tratamento de residuos. O texto redefine o feito impoñible, limitándoo ás prestacións de carácter obrigatorio, e introduce un novo sistema de tarifas mixto, con cota fixa e cota variable en función do número de persoas empadroadas por vivenda ou dos metros cadrados dos locais comerciais. O Concello non aplicará por agora o 100% do custo real do servizo, senón aproximadamente o 75%.
A Corporación tamén tratará a aprobación do POS+ Adicional 4/2025, que achega 498.473 euros ao municipio. Desta cantidade, 152.984 euros destinaranse a gasto corrente e o resto (345.488 euros) a investimentos financeiramente sostibles.
Tamén se debaterá a autorización do incremento das gratificacións, horas extraordinarias e complementarias do persoal, cun montante global fixado en 394.885 euros, condicionado á aprobación do suplemento de crédito.
O centro deportivo municipal A Telleira será outro dos eixos do debate. Prevese a revisión dos prezos do contrato de xestión e mantemento para 2026, cun incremento do 2,3%, derivado da evolución do IPC galego entre xullo de 2024 e xullo de 2025. Ademais, someterase a aprobación inicial a modificación da ordenanza reguladora do prezo público polo uso das instalacións, co mesmo incremento porcentual.
Por último, o grupo municipal popular presentará dúas mocións: unha para mellorar a seguridade viaria na estrada provincial DP-0206 e outra relacionada cos vertidos no río Sar provocados polas obras da nova depuradora de Silvouta, en Santiago de Compostela.
O pleno comezará coa dación de conta dos decretos da Alcaldía, das actas da Xunta de Goberno Local e das liñas fundamentais do orzamento municipal para 2026, ademais da auditoría das redes de saneamento das concas que verten ás EDAR de Ponte Nova e Ameixenda.
