A sección sexta da Audiencia Provincial da Coruña, con sede en Santiago de Compostela, celebrará o vindeiro mércores, día 29, o xuízo contra un home acusado de estafar 6.500 euros a unha muller residente en Bertamiráns, á que coñeceu a través da rede social Facebook.
Segundo o escrito de acusación da Fiscalía, os feitos remontan a 2022, cando o acusado mantivo coa vítima unha relación de afectividade por Internet. Aproveitando esa confianza, solicitoulle diversas cantidades de diñeiro co pretexto de facer fronte a gastos derivados dun xuízo penal por unha pelexa e pola reparación do seu vehículo.
A muller, “na confianza que dita relación persoal lle xeraba”, realizou tres transferencias bancarias: dúas de 2.500 euros os días 28 de marzo e 2 de maio de 2022, e outra de 1.500 euros o 1 de xuño do mesmo ano. Unha vez recibidas as cantidades, o acusado interrompeu todo contacto coa vítima.
A Fiscalía solicita para o procesado unha pena de quince meses de prisión e que indemnice á muller con 6.500 euros polos prexuízos causados. O tribunal compostelán será o encargado de determinar a súa responsabilidade penal na vista oral.
