A radio municipal do Concello de Ames celebrou este venres, 13 de xuño, a clausura da súa temporada de Radio Cidadá cun programa especial que se emitiu en directo desde o Pazo da Peregrina, en Bertamiráns. O espazo foi conducido pola xornalista Belén Martínez, e supuxo o peche dun curso radiofónico centrado na participación veciñal.
Ao longo da tarde, subiron aos micrófonos da emisora local os responsables de nove programas realizados pola cidadanía, que tiveron ocasión de facer balance da súa experiencia nesta e noutras tempadas. Ademais, incluíronse tres intervencións gravadas previamente por persoas que non puideron asistir ao evento, completando así un total de doce programas representados no peche de tempada.
O acto comezou cunha entrevista ao alcalde e concelleiro de Comunicación, Blas García, quen reafirmou o compromiso do goberno local con este proxecto. “Somos das poucas emisoras municipais, por non dicir a única, que abre as súas portas de xeito literal á veciñanza para que poidan realizar os seus propios programas de radio”, declarou García, quen definiu a Radio Cidadá como “un emblema” tanto da emisora como do Concello de Ames.
A xornada finalizou cunha actuación musical en directo a cargo do artista Mad Martin, que estivo acompañado por Nico, poñendo o ramo a unha tarde de comunicación comunitaria e celebración do dereito a expresarse a través das ondas.
A Radio Cidadá de Ames Radio mantén unha estrutura aberta á participación da veciñanza e constitúe un dos piares da programación da emisora, que durante todo o ano ofrece un espazo público e accesible para que a cidadanía comparta as súas inquedanzas, intereses e proxectos. O programa especial serviu así de escaparate da diversidade de voces que conforman o tecido social do municipio.
