O programa ‘Modo galego, actívao!’, impulsado pola Real Academia Galega (RAG) e o Concello de Ames, mobilizará máis de 2.500 nenos e nenas para potenciar o uso do galego na vida cotiá. Este proxecto, que chega á súa terceira edición, engade este ano ao alumnado de 1º e 2º da ESO dos institutos de Milladoiro e Bertamiráns, ampliando o alcance da iniciativa máis alá dos centros de infantil e primaria.
O programa, presentado no CEIP A Maía, combina a investigación e a acción para fomentar o galego mediante actividades lúdicas e unha avaliación dos resultados. Segundo explicou o coordinador do Seminario de Sociolingüística da RAG, Henrique Monteagudo, este enfoque busca identificar as estratexias máis efectivas para incrementar o uso do idioma na infancia e na adolescencia.
Durante un mes, os estudantes asumirán retos diarios ou semanais, dependendo da súa idade, con actividades como compartir soños, trabalinguas ou música en galego, así como buscar complicidades na súa contorna ou gravar audios para fomentar o idioma. Por cada desafío cumprido, os participantes recibirán adhesivos con superpoderes que completan unha cartilla deseñada por Ruth Caramés.
COMPROMISO INSTITUCIONAL E EDUCATIVO
O presidente da RAG, Víctor F. Freixanes, salientou na presentación que o galego é un “patrimonio inmaterial que debemos conservar” e chamou á xuventude a ser parte activa da súa promoción. Pola súa banda, o alcalde de Ames, Blas García, destacou que o municipio se ten consolidado como un “protector da nosa lingua”, con iniciativas como a sinatura do convenio coa RAG no ano 2024 que garante a continuidade deste programa.
Carmen Porto, concelleira de Planificación e Xestión Educativa, subliñou que o alcance do programa este ano permitirá abarcar un rango de idade máis amplo, reforzando o compromiso municipal coa promoción do galego mediante propostas complementarias como Galitiktokers e Youtubeiras.
A iniciativa responde a unha situación preocupante sinalada polo Instituto Galego de Estatística: só o 16 % da rapazada de 5 a 14 anos utiliza o galego de maneira habitual. Neste contexto, ‘Modo galego, actívao!’ busca reverter esta tendencia, implicando tamén ás familias, ao profesorado e ao persoal dos servizos educativos complementarios do concello.
