O Concello de Ames continúa coa súa programación de actividades de Nadal coa posta en marcha do Tren do Nadal, que percorrerá as rúas do Milladoiro e Bertamiráns os días 3 e 4 de xaneiro. Esta actividade gratuíta enmárcase na Gran Festa de Reis e busca ofrecer unha experiencia familiar diferente ao tempo que dinamiza o comercio e a hostalaría local.
O tren circulará en horario de tarde o venres 3 de xaneiro (de 17.00 a 19.30 horas) e tanto pola mañá como pola tarde o sábado 4 (de 11.00 a 13.30 e de 17.00 a 19.30 horas). Debido á coincidencia co mercado de rúa o sábado pola tarde en Bertamiráns, o percorrido nesa franxa horaria terá pequenas modificacións.
No Milladoiro, o tren partirá da parada de bus do Centro de Saúde, pasando por rúas como Pardiñeiros, Agro do Medio, Raxoeira e Anxeriz, para regresar ao punto de saída. En Bertamiráns, o percorrido habitual inclúe puntos como a Rúa Alcalde Lorenzo, Avenida da Maía, Rúa do Pedregal e Agro do Medio.
A concelleira de Promoción Económica, Ana Belén Paz, explicou que o obxectivo é “ofrecer propostas que combinen o lecer familiar coa dinamización do comercio local, creando un ambiente festivo único para as familias de Ames”.
Esta iniciativa súmase á variada programación de Nadal que o Concello de Ames está a desenvolver, consolidando as festividades como un momento de encontro para as familias e de impulso para o tecido comercial e hostaleiro local.
