O Concello de Ames iniciou unha campaña de colaboración veciñal para localizar e rexistrar pozos sen cubrir ou en mal estado, despois de que o pasado sábado, 23 de novembro, un rapaz fose rescatado dun pozo de seis metros de profundidade en Bertamiráns. A infraestrutura, situada nunha finca de titularidade privada, supoñía un risco evidente e xa foi notificada aos propietarios para a súa corrección. O menor, que foi atendido no lugar, atopábase en bo estado tras o incidente.
Dende o Concello, apélase á responsabilidade dos propietarios para manter estas infraestruturas seguras e debidamente rexistradas. A administración local advirte que os pozos abandonados ou descoidados representan un perigo grave para a poboación, especialmente para nenos e animais.
Os cidadáns poden comunicar a localización de pozos perigosos ou solicitar información sobre o rexistro dos seus propios chamando ao 981 88 30 02 en horario de 9:00 a 15:00 horas ou enviando un correo a gabinete@ames.gal. Ademais, o Concello anunciou que levará a cabo revisións das súas propiedades municipais para asegurar que non existan pozos sen rexistrar ou en mal estado.
A problemática non é nova no municipio. Hai pouco máis dunha semana, a Concellería de Medio Ambiente recibiu o aviso dun veciño sobre un pozo aberto próximo ao CEIP de Barouta. Neste caso, o pozo foi balizado e cuberto de inmediato, e notificouse a situación á Xunta de Galicia, propietaria do terreo, que asumiu as tarefas de corrección.
O Concello destaca a importancia da colaboración cidadá para evitar accidentes similares ao de Bertamiráns e garantir a seguridade da veciñanza. O alcalde reiterou que ‘a detección e corrección destes pozos é unha tarefa que require o compromiso tanto das administracións como dos propietarios particulares’.
