O BNG de Ames presentou unha moción ante o Concello de Ames para mellorar as condicións do transporte público nas zonas rurais do municipio, solicitando a instalación de novas marquesiñas e información clara en cada parada. Segundo explica a formación nacionalista, a información dispoñible actualmente é “totalmente inintelixible para a veciñanza”.
A voceira do BNG en Ames, Escarlata Pampín, destacou que as condicións actuais prexudican especialmente aos colectivos sen transporte privado, como persoas maiores e mocidade: ‘Demandamos servizos que melloren a mobilidade das persoas, un problema que afecta a tódalas idades e que agrava a dependencia de familiares ou coñecidos para desprazarse’.
Ademais, a moción inclúe unha petición á Xunta de Galicia para que garanta o cumprimento dos contratos do servizo público de transporte conforme aos pregos e ás propostas que foron seleccionadas nos concursos. O BNG demanda tamén a posibilidade de implantar un servizo de Noitebús que cubra as zonas rurais de Ames, co fin de ofrecer unha alternativa de transporte accesible durante a noite.
Esta moción forma parte dunha campaña do BNG en Ames para reclamar un servizo de transporte digno e eficiente no municipio.
