Hoxe en día coñecemos a Praza Roxa por ser un dos lugares máis recoñecibles de Compostela. Un lugar onde centos de estudantes reúnense día tras día para “terracear” as tardes de bo e mal tempo. Pero non sempre se lle coñeceu como “Praza Roxa” nin sempre tivo o aspecto actual.
O primeiro nome co que se coñeceu á praza foi o de Jose Antonio e por aquelas alturas era un lugar polo que transitaba moito tráfico de coches. Durante os anos da ditadura e da transición, os estudantes composteláns máis revolucionarios tomaron a praza como un lugar de manifestacións. Por esas mobilizacións, os picheleiros comezaron a nomear popularmente á paza como “Praza Roxa” facendo referencia á orientación política de “roxos” deses estudantes. O nome foise estendendo ata que se consolidou de forma oficial, como a coñecemos hoxe en día.
A praza experimentou diversas transformacións ao longo das décadas. Nun primeiro momento contaba cunha gran fonte circular no centro que actuaba de rotonda para xestionar o gran volume de tráfico que circulaba por ela. Esa primeira fonte foi trasladada en 1990 ao barrio de Vite no Campus Norte, deixando paso a unha reforma do espazo. Pouco despois, instalouse unha nova fonte en forma de cáliz. O máis curiosa desta nova fonte foi a tradición que se instaurou ao seu redor. Converteuse no lugar onde os seguidores do clube de fútbol Compostela celebraban os éxitos do seu equipo. Xa no ano 2003, esta fonte foi tamén retirada e reubicada no Polígono do Tambre.
Na actualidade, a Praza Roxa ten unha estética moderna e aberta, sen fontes e cun tráfico moi escaso, priorizando ós peóns e os negocios que a enchen. Converteuse nun lugar de reunións nas terrazas, que se enchen cada día de estudantes que recordan a aqueles anos de manifestacións.
