A Maker Faire Galicia inaugurou este venres en Santiago de Compostela a súa XII edición cunha primeira xornada dedicada ao emprendemento e á innovación social, que se desenvolve ao longo de todo o día en Área Central. O encontro reúne nesta primeira sesión a máis de 150 makers procedentes de diferentes países e inclúe postos, obradoiros e relatorios orientados a todos os públicos.
A apertura contou coa participación da tenenta de alcaldesa e concelleira de Dereitos e Servizos Sociais, Promoción Económica e Xuventude, María Rozas, quen defendeu a necesidade de poñer “o coñecemento tecnolóxico ao servizo das persoas, pensando en solucionar os problemas reais da xente, e innovando desde o compromiso e a consciencia social”.
Na súa intervención, Rozas destacou o papel da Maker Faire Galicia como espazo vinculado á divulgación tecnolóxica, á experimentación e á aprendizaxe práctica. A concelleira puxo en valor “o compromiso e a consciencia social da Maker Faire Galicia, fiel á filosofía do movemento maker que reivindica o coñecemento compartido, a democratización da tecnoloxía e o aprender facendo”.
A representante municipal tamén ratificou o apoio do Concello de Santiago a un evento que, segundo sinalou, contribúe a proxectar unha imaxe da cidade ligada á innovación e á diversidade. Neste sentido, asegurou que a feira “mostra o Santiago do que nos sentimos orgullosas, pón en evidencia o potencial da nosa cidade, e amosa unha Compostela moderna, heteroxénea, innovadora e inclusiva”.
A programación desta primeira xornada combina a exposición de proxectos con actividades formativas e divulgativas. Entre elas figuran diferentes obradoiros para todos os públicos, moitos deles pensados para achegar o coñecemento tecnolóxico á infancia. Tamén se celebran ponencias centradas no uso da tecnoloxía para mellorar a inclusión e a calidade de vida de colectivos como o das persoas con discapacidade.
A Maker Faire Galicia chega así á súa XII edición consolidada como unha cita de referencia no ámbito da innovación en Galicia e no conxunto do Estado. Nesta edición, a organización estruturou o programa en tres xornadas diferenciadas, das que a de Área Central abre o calendario baixo o eixo do emprendemento e a innovación social.
Tras esta primeira sesión, a feira continuará con dúas novas citas na Casa das Máquinas. A seguinte será o 9 de outubro, centrada na industria, mentres que o 20 de novembro terá lugar a xornada dedicada aos oficios.
A Maker Faire Galicia conta co apoio do Concello de Santiago e da Xunta de Galicia. O evento organízase e opera de forma independente baixo licenza de Make Community LLC, co obxectivo de fomentar a creatividade, a innovación e o talento dentro da comunidade maker.
