O outono comezará este domingo, 22 de setembro, ás 14:44 horas, prolongándose ata o 21 de decembro, unha estación que durará case 91 días. Este paso do verán ao outono coincide co momento en que o Sol chega ao punto Libra da eclíptica, marcando o equinoccio, cando o día e a noite teñen teóricamente a mesma duración.
Un dos eventos máis destacados deste outono será a chuvia de estrelas Xemínidas, prevista para o 14 de decembro, aínda que a presenza da Lúa chea poderá dificultar a súa visibilidade. Tamén haberá outras choivas de estrelas, como as Dracónidas (8 de outubro), as Oriónidas (21 de outubro) e as Leónidas (17 de novembro), pero con menor intensidade.
En canto á observación de planetas, Saturno e Xúpiter serán visibles durante boa parte das noites de outono, mentres que Mercurio poderá verse en novembro ao anoitecer. En canto aos eclipses, o próximo eclipse anelar de Sol do 2 de outubro non será visible en Europa, pero nos próximos anos teremos unha secuencia de eclipses solares en Galicia, incluíndo un total o 12 de agosto de 2026.
Desde un punto de vista meteorolóxico, o verán que remata foi pouco chuvioso na contorna de Santiago de Compostela, con temperaturas consideradas normais segundo os rexistros da estación meteorolóxica do Observatorio Astronómico Ramón María Aller en colaboración coa AEMET. Nos meses de xuño, xullo e agosto recolléronse un total de 83,7 litros/m² de precipitacións.
En canto ás temperaturas, a máxima do verán foi de 33,4ºC, rexistrada tanto o 29 de xullo como o 10 de agosto. Setembro mantívose con temperaturas suaves, destacando a do 6 de setembro, cando non se superaron os 15,2ºC debido á chegada dunha dana.
