O Concello de Santiago precintou este martes, por primeira vez, tres vivendas de uso turístico (VUT) que non dispuñan de licenza municipal. Trátase dun edificio situado na rúa do Espírito Santo, que está incluída no ámbito do Plan Especial da Cidade Histórica, onde non están permitidos este tipo de aloxamentos.
Así o ratifican a Europa Press fontes do goberno local, que explican que o precinto trátase dunha medida “subsidiaria” que permite a lei galega de chan, despois de que se seguise o correspondente procedemento administrativo contra o propietario destes inmobles.
Neste sentido, as mesmas fontes recalcan que se lle abriu o expediente sancionador hai tempo e que se lle notificou, pero finalmente procedeuse ao seu peche porque non cesou a súa actividade.
O goberno local agradece a “colaboración veciñal” neste operativo, que “facilitou” o coñecemento dos feitos. Ademais, o Concello compostelán avisa de que fará “cumpir a legalidade” contra o resto de VUT que operen á marxe da normativa municipal, incluso activando este mesmo precinto.
Cabe lembrar que, en varias sentenzas, o Tribunal Superior de Xustiza de Galicia (TSXG) xa se pronunciou favorablemente aos peches dos pisos turísticos que non contasen coa habilitación do Concello, mesmo aínda que estean inscritas no rexistro da Xunta, coñecido como REAT (Rexistro de Empresas e Actividades Turísticas).
Neste sentido, hai meses, Raxoi cifrou 816 as VUT que estaban anotadas no REAT pero que non contaban con licenza municipal. De feito, de todas elas, só 170 estarían situadas en localizacións que cumpren a normativa. As restantes si poderían funcionar como piso turístico 60 días ao ano, pero non así as que estean dentro da cidade histórica, como é o caso do edificio precintado este martes.
Así mesmo, tanto a alcaldesa, Goretti Sanmartín, como o concelleiro de Urbanismo, Iago Lestegás, reclamaron á Xunta que procedese á retirada dos inmobles sen licenza do rexistro autonómico.
