O local de Creativas Galegas en Santiago puxo en marcha un programa piloto da Xunta que permitirá que os clientes, a través do escaneo dun código QR, poidan presentar reclamacións nun formulario virtual.
Segundo explica a Consellería de Emprego, Comercio e Emigración, na ligazón que se abre co QR poden cumprimentar os datos e o motivo da reclamación, que será remitida á empresa responsable do negocio.
De forma automática, a persoa recibirá un correo que deixará constancia da data e a hora, e que lle indicará que a empresa dispón dun mes para contestarlle. No caso de que non o faga nese prazo ou que a resposta non sexa satisfactoria, o consumidor poderá dirixir nova reclamación ao Instituto Galego do Consumo e da Competencia (IGCC) a través dunha ligazón que xa se inclúe no propio correo.
O director xeral de Comercio e Consumo da Xunta, Gabriel Alén, a directora do IGCC, Sol Vázquez, e a presidenta do Consello Galego de Consumidores e Usuarios, Rosa Celia Otero, presentaron recentemente esta iniciativa no local de Creativas Galegas que estrea este mecanismo.
Desde alí, Alén explicou que este comercio será o único que disporá do sistema na primeira fase do proxecto piloto que proximamente se estenderá a outras partes da xeografía galega. O director xeral destacou a importancia desta iniciativa para dotar de “simplicidade, axilidade e eficacia” o proceso de reclamación en materia de consumo.
