O Concello de Santiago de Compostela presentou este mércores un avance da programación de Nadal de 2026, que se desenvolverá durante máis dun mes e terá como principais escenarios a praza do Obradoiro, a Alameda, a praza Roxa e a Carreira do Conde, ademais dos centros socioculturais e outros espazos dos barrios e parroquias. O calendario arrancará oficialmente o martes 1 de decembro, cunha festa de acendido da iluminación que comezará ás 18:30 e na que a música e a participación da veciñanza serán protagonistas.
A alcaldesa, Goretti Sanmartín, compareceu acompañada da primeira tenente de alcaldesa e concelleira de Promoción Económica e Xuventude, María Rozas, e da concelleira de Festas, Pilar Lueiro, para dar a coñecer as primeiras actividades dun programa no que participan numerosos departamentos municipais.
O Goberno local mantén así a intención de consolidar o Nadal como unha das principais celebracións da cidade, xunto coas festas da Ascensión e do Apóstolo, mediante unha oferta que combina actividades culturais, música, comercio, propostas infantís e iniciativas destinadas á mocidade.
A festa inaugural desenvolverase baixo o lema ‘Compostela prende o Nadal a coro’ e terá como principal novidade unha actuación colectiva na que se convidará ao público a cantar xunto ao Coro da Ra, unha agrupación compostelá con máis de 30 anos de traxectoria e arredor de 50 voces.
O acto incluirá a interpretación conxunta da canción ‘Nadal’, de Luita, unha vez acendidas as luces e a árbore instalada na praza do Obradoiro. Para facilitar que as persoas asistentes poidan participar, o Concello distribuirá a letra da canción e difundiraa previamente nas redes sociais.
Antes do acto central haberá dous pasarrúas musicais a cargo do grupo Ultreia, que se dividirá en dúas formacións. Unha delas partirá das Casas Reais e a outra do Mercado de Nadal da Carreira do Conde. Ambas percorrerán diferentes puntos da cidade ata confluír no Obradoiro, onde realizarán unha interpretación conxunta antes da actuación do Coro da Ra.
Os percorridos comezarán ás 18:30, mentres que a celebración principal está prevista para as 19:00. Durante a xornada tamén se estreará a instalación de xogos da praza do Obradoiro e ofrecerase chocolate quente, que será apto para persoas con intolerancia ao glute ou á lactosa.
Sanmartín explicou que o Concello prepara outras actividades e sorpresas que non se anunciarán ata o propio día da celebración.
O acendido terá lugar nunha data diferente á habitual debido á convocatoria electoral. A alcaldesa sinalou que o Goberno municipal decidiu trasladar a festa fóra da campaña e fixala no primeiro día de decembro.
A rexedora recoñeceu que a celebración nun martes pode influír na asistencia, aínda que defendeu que o horario, previsto entre as 18:30 e as 20:30, permitirá a participación das familias.
A decoración manterá a estrela de oito puntas como símbolo do Nadal compostelán, cunha nova adaptación gráfica que incorpora raios de luz inspirados na identidade corporativa do Concello.
No referente á iluminación, Pilar Lueiro explicou que se mantén o contrato adxudicado o pasado ano para dúas campañas de Nadal.
A instalación contempla 2.975 metros de corredores luminosos, 290 arcos, 296 motivos en farois, seis carteis e oito elementos singulares. Tamén regresarán os paraugas luminosos das prazas do Toural e de Cervantes, dúas cortinas de luz en fachadas e a iluminación artística do Pazo de Raxoi.
Na praza do Obradoiro instalarase novamente unha árbore transitable de 20 metros de altura, que se acenderá oficialmente o 1 de decembro.
A decoración estenderase tamén ás prazas de Abastos, Roxa e de Galicia, así como á contorna do antigo Concello de Cervantes. O dispositivo incluirá a iluminación de 125 árbores, dúas rotondas, dúas árbores tridimensionais de cinco metros e catro conxuntos de figuras decorativas.
Ademais, haberá elementos luminosos singulares en 23 barrios, aos que se sumarán intervencións impulsadas desde Turismo na Ferradura e na praza da Quintana.
A alcaldesa aclarou que as instalacións estarán preparadas antes da inauguración e que o 27 de novembro se realizarán probas de iluminación para comprobar o funcionamento dos diferentes elementos. O acendido completo manterase reservado para a festa do 1 de decembro.
DOUS MERCADOS DE NADAL REUNIRÁN 90 EXPOSITORES
O comercio volverá ocupar un lugar destacado no programa coa celebración de dous mercados de Nadal.
O primeiro abrirá na Carreira do Conde o 27 de novembro e permanecerá ata o 5 de xaneiro. Posteriormente incorporarase o mercado de Área Central, que funcionará do 21 de decembro ao 5 de xaneiro.
Cada un contará con 15 casetas e, ao longo das diferentes quendas, participarán 90 expositores, practicamente todos galegos e aproximadamente a metade procedentes de Santiago e da súa comarca.
A oferta incluirá alimentación, decoración de Nadal, xoiería, ilustración, téxtil, complementos, cosmética, velas, cerámica, madeira e diferentes produtos de agasallo.
Tamén se reservarán espazos para entidades do terceiro sector e organizacións non gobernamentais, que poderán comercializar produtos solidarios.
María Rozas destacou a intención de manter unha oferta comercial diversa e vinculada ao tecido produtivo galego, ao tempo que os mercados contribúen á actividade económica da cidade durante estas datas.
CONCERTOS, XINCANAS E ACTIVIDADES PARA A MOCIDADE
Un dos eixos desta edición será a ampliación das propostas dirixidas á poboación adolescente e xuvenil, co obxectivo de ofrecer alternativas de lecer durante as vacacións escolares.
Na carpa da praza Roxa regresarán os ciclos musicais ‘Son Xove’ e ‘Son Vermú’. O primeiro permitirá actuar ás bandas que utilizan os locais de ensaio do Centro Xove da Almáciga, mentres que o segundo estará organizado desde a área municipal de Comercio.
Tamén se programarán actuacións no Centro Xove da Almáciga e no centro sociocultural da Trisca, un espazo no que Xuventude comezou a desenvolver actividades este ano.
A programación incluirá concertos nas rúas, unha xincana polo casco histórico na que a mocidade deberá superar diferentes probas relacionadas coa historia de Compostela e o regreso das actividades organizadas en colaboración coa asociación Itaca.
Rozas explicou que a intención é que a oferta de Nadal non se limite ao público infantil, senón que permita aos adolescentes e á mocidade participar en propostas adaptadas aos seus intereses.
MÁIS DE 60 ACTIVIDADES NOS CENTROS SOCIOCULTURAIS
A programación municipal tamén se estenderá aos centros socioculturais, que acollerán máis de 60 actividades durante o período de Nadal.
Entre as propostas figuran obradoiros de cociña, talleres de elaboración de elementos decorativos e diferentes espectáculos de artes escénicas.
O Concello pretende distribuír estas iniciativas por distintos barrios e parroquias para facilitar que a veciñanza poida participar sen necesidade de desprazarse ata o centro urbano.
Nesta mesma liña, o Goberno local anunciou unha maior presenza de actividades no rural compostelán, cuxos detalles se darán a coñecer nunha presentación posterior.
UN NOVO PROGRAMA DE CONCILIACIÓN CHEGARÁ A SEIS CENTROS SOCIOCULTURAIS
Entre as novidades deste ano figura ‘Exploradores do Inverno’, unha iniciativa de conciliación familiar destinada preferentemente a familias empadroadas no Concello de Santiago con nenos e nenas nacidos entre 2014 e 2021.
O programa desenvolverase nos centros socioculturais da Gracia, Marrozos, Figueiras, Bando, Laraño e Nemenzo.
As actividades están previstas para os días 22, 23, 28, 29 e 30 de decembro, así como o 4, 5 e 7 de xaneiro, en horario de 09:00 a 14:30.
A iniciativa busca facilitar a organización das familias durante as vacacións escolares mediante unha oferta de actividades para as crianzas en diferentes puntos do municipio.
A SAN SILVESTRE E A ORQUESTRA MIRAMAR DESPEDIRÁN O ANO
O calendario recuperará tamén varias citas habituais das festas compostelás, entre elas a carreira de San Silvestre, que nos últimos anos reuniu arredor de 2.200 participantes.
O Concello aspira a alcanzar nesta edición o límite de 2.500 inscricións e anima a participar a persoas de diferentes idades e condicións físicas.
A música tamén terá protagonismo na despedida do ano, cunha festa de fin de ano amenizada pola orquestra Miramar. O Goberno municipal avanzou que haberá outras propostas específicas para esa celebración, aínda que os detalles se comunicarán máis adiante.
Entre as actividades anunciadas figuran igualmente ‘Estrelas e Desexos’, prevista para o 30 de decembro no palco da Alameda, a Ruada do Apalpador, as propostas da Casa das Máquinas, a programación da Tropa C, a festa de fin de ano e a tradicional Cabalgata de Reis.
O Concello realizará novas presentacións nas próximas semanas para concretar os horarios, os espazos e o contido das actividades que aínda están pendentes de anunciar.

