A candidata á Reitoría da Universidade de Santiago de Compostela, Maite Flores, cuestionou a incorporación do cardiólogo José Ramón González Juanatey como delegado para a Estratexia de Ciencias da Saúde na candidatura encabezada por Rosa Crujeiras, ao considerar que a súa situación administrativa impediría manter o cargo a curto praz
Segundo indicou Flores nunha nota remitida aos medios, a normativa interna da USC establece que as persoas que desempeñan responsabilidades académicas deben contar cunha dedicación docente a tempo completo. A candidata sinala que González Juanatey deixará de cumprir ese requisito ao finalizar o presente curso, polo que, de acordo coa súa interpretación da regulación vixente, non podería continuar como delegado nesa área.
Flores lembra que o Regulamento polo que se establece o réxime de redución docente e retribución de cargos e responsables académicos, aprobado polo Consello de Goberno da USC en 2019 e actualizado en 2022, considera as delegacións do reitorado como cargos académicos. Neste sentido, sostén que os Estatutos da universidade establecen a obrigatoriedade de que quen exerza estas responsabilidades teña vinculación a tempo completo coa institución.
A candidata explicou que, de producirse o cambio de situación profesional de González Juanatey, “debería abandonar ese posto”, o que, ao seu xuízo, podería xerar inestabilidade nun ámbito que considera relevante para o desenvolvemento do convenio de descentralización da Facultade de Medicina.
Na mesma comunicación, Flores afirmou que mantén “a mellor consideración profesional” polo facultativo, mais indicou que non comprende a súa participación na candidatura rival “cando sabe que en poucos meses non podería continuar no cargo”. Segundo a candidata, o propio médico teríalle comentado que a súa intención sería permanecer aproximadamente un ano na responsabilidade, unha posibilidade que, segundo sostén, non sería viable coa normativa actual.
REFERENCIAS Á CAMPAÑA ELECTORAL
A candidata tamén interpretou este movemento como parte da estratexia electoral da candidatura de Crujeiras, especialmente no contexto da Facultade de Medicina, un dos centros con maior número de electores nos comicios ao reitorado.
Flores sostén que a designación responde a un intento de reforzar apoios neste ámbito e asegurou que a súa candidatura percibe unha evolución favorable na campaña. “A remontada está cada vez máis cerca”, sinalou.
PETICIÓN DE “REPROBACIÓN PÚBLICA”
Ademais, Flores solicitou que Rosa Crujeiras realice unha “reprobación pública” da súa candidata a vicerreitora de Innovación e Ciencia Aberta, Almudena Hospido, e doutra persoa vinculada á candidatura, Ramón Ángel Bouzas. A petición prodúcese tras as advertencias feitas recentemente pola Comisión Electoral da USC en relación con feitos acontecidos durante a primeira volta do proceso electoral.
