O profesor da Facultade de Ciencias da Comunicación da Universidade de Santiago de Compostela e investigador do Grupo Novos Medios, Miguel Túñez López, foi distinguido co premio a Investigador do Ano no marco do XVII Congreso Internacional da Revista Latina de Comunicación Social, unha das publicacións científicas de referencia no ámbito da comunicación, situada nos primeiros cuartís dos índices Scopus e Journal Citation Reports (JCR).
O xurado do galardón destacou o liderado científico de Túñez, así como unha traxectoria investigadora caracterizada por unha produción académica amplamente citada e por unha dedicación continuada ao estudo da innovación e da intelixencia artificial aplicadas á comunicación. O recoñecemento pon o foco nun traballo sostido no tempo e cunha clara proxección tanto no ámbito universitario como no sector dos medios.
Na actualidade, Miguel Túñez é director da Cátedra Institucional RTVE–USC sobre Medios de Servizo Público en Europa, dende a que desenvolve liñas de investigación centradas na transformación dos medios públicos de servizo (PSM) nun contexto marcado polo avance das plataformas dixitais e polos cambios no consumo informativo. Segundo salientou a organización do congreso, o seu labor contribuíu a analizar os retos estruturais e estratéxicos que afrontan estes medios no novo ecosistema comunicativo.
A Revista Latina de Comunicación Social subliñou tamén o seu papel como investigador principal en diversos proxectos competitivos, cuxos resultados axudaron á creación de modelos de referencia en España para a xestión e a avaliación do valor público dos medios, especialmente no ámbito dos servizos públicos audiovisuais.
Este premio forma parte dos oito recoñecementos anuais que concede a publicación científica co obxectivo de visibilizar o talento, a perseveranza e a dedicación do persoal investigador e profesional das Ciencias da Comunicación.
