O Instituto Galego de Física de Altas Enerxías (Ifgae) inaugurou este mércores a súa nova sede no Campus Sur da Universidade de Santiago de Compostela, tras unha reforma e ampliación que supuxo un investimento de máis de cinco millóns de euros. As novas instalacións, que ocupan máis de 5.000 metros cadrados na residencia universitaria Monte da Condesa, pretenden reforzar a posición do centro en proxectos científicos de referencia mundial.
O acto contou coa presenza de autoridades como o presidente da Xunta de Galicia, Alfonso Rueda, a alcaldesa de Santiago, Goretti Sanmartín, o reitor da USC, Antonio López, e o conselleiro de Educación, Ciencia, Universidades e Formación Profesional, Román Rodríguez. Todos eles participaron nunha visita guiada polas instalacións acompañados polo director do Ifgae, Carlos Salgado.
Segundo Salgado, a renovación do centro representa un “fito histórico da ciencia en Galicia”, que facilitará o desenvolvemento de proxectos ambiciosos en áreas como a física de partículas, as ondas gravitacionais ou a computación cuántica. A mellora das infraestruturas permitirá, explicou, que o instituto reforce a súa participación en experimentos científicos de primeiro nivel internacional.
Durante a súa intervención, o presidente da Xunta destacou a importancia de investir na ciencia como factor de competitividade global. “Se non se aposta pola ciencia, Galicia estaría a perder unha carreira que outros xa están a correr con todas as consecuencias”, afirmou. Tamén puxo o foco na necesidade de atraer e reter talento investigador: “Temos que ser unha terra con institucións apetecibles para desenvolver unha carreira investigadora”, sinalou.
Pola súa banda, a alcaldesa de Santiago insistiu na idea de que a cidade debe ser tamén un lugar de “formación, transferencia e encontro” científico. “Queremos construír unha cultura científica arraigada en Compostela”, afirmou Sanmartín.
O reitor Antonio López subliñou a implicación do Ifgae nos principais proxectos científicos do mundo, pero tamén na súa vocación de transferencia do coñecemento á sociedade, co obxectivo de mellorar as condicións de vida das persoas.
A nova etapa do Ifgae chega nun contexto no que a cidade de Santiago aspira a consolidarse como un nodo científico estratéxico, grazas ao traballo conxunto entre a universidade, as administracións públicas e os centros de investigación. A inauguración da sede reforza esa aposta e abre novas posibilidades para a ciencia feita en Galicia.
