O Concello de Santiago abriu un concurso internacional destinado a atopar unha proposta para a iluminación artística da contorna da Catedral, seleccionada por un xurado de “primeiro nivel internacional”. Os seis anteproxectos finalistas recibirán un premio de 18.150 euros e o gañador terá a opción de desenvolver a súa proposta, cun contrato orzado en 100.000 euros. Segundo trasladou o Consistorio nunha nota, trátase dun certame “pioneiro” no ámbito do deseño lumínico urbano e patrimonial, co apoio técnico integral da empresa compostelá TRIVIUM. A convocatoria está orientada ao catro prazas emblemáticas: Obradoiro, Praterías, Inmaculada e Quintana e os seus elementos conectores.
O concurso desenvolverase en dúas fases anónimas. En primeiro lugar, o Concello abriu un prazo de entrega das ideas conceptuais durante 60 días naturais a partir do 21 de xuño, día seguinte da publicación da licitación na Plataforma de Contratación do Sector Público. O certame contempla o pago de premios aos seis anteproxectos finalistas coas puntuacións máis altas, aos que se abonará a cada un 18.150 euros. Finalizado o concurso, tramitarase un procedemento negociado sen publicidade para levar adiante a proposta gañadora, por un valor de 100.000 euros.
Para iso, conta cun xurado de persoas especialistas “recoñecidas a nivel mundial”: o arquitecto e urbanista David Chipperfield; a doutora arquitecta e profesora Teresa Táboas, o Catedrático de Historia da arte Manuel Antonio Castiñeiras; o fundador do estudo Concepto en París, Roger Narboni, e a editora da revista ‘Lightecture’, Esther Torelló. “O obxectivo é alcanzar un proxecto de iluminación pioneiro, que se axuste ás necesidades do noso patrmionio, ás condicións ambientais desta cidade e que respecte a delicadeza e as sutilezas do ceo nocturno”, explicou a alcaldesa, Goretti Sanmartín, durante o acto de presentación realizado este martes en casa dás Máquinas.
O concurso está aberto á participación de profesionais nacionais e internacionais, persoas físicas, xurídicas ou equipo, cun enfoque interdisciplinar que integra perfís de arquitectura patrimonial, urbanismo, deseño lumínico e humanidades.
