InicioSANTIAGOSantiago celebra máis de 600 cacharelas e sardiñadas na noite de San...

Santiago celebra máis de 600 cacharelas e sardiñadas na noite de San Xoán

A festa estendeuse por toda a cidade con música, gastronomía, herbas meigas e fogueiras sen incidentes

Publicado o

Xornal de Compostela

A noite máis curta do ano en Santiago de Compostela volveu encherse de lume, cheiro a sardiña e música popular, nunha celebración de San Xoán que tivo un seguimento masivo en barrios e no casco histórico. Segundo datos facilitados polo Concello, autorizáronse máis de 600 cacharelas e sardiñadas, tanto en espazos públicos como privados, sen que se rexistrasen incidencias salientables segundo os servizos de emerxencia.

As prazas e rúas do centro histórico, como Salvador Parga, Pescadería Vella, 8 de Marzo, Algalia de Abaixo e Casas Reais, foron algúns dos puntos escollidos pola veciñanza para cumprir cos ritos tradicionais desta noite, entre eles o de saltar o lume para purificarse e afastar os males. A praza de Mazarelos destacou pola súa programación diúrna, que incluíu pasarrúas, obradoiros de baile e música, e actividades arredor das herbas de San Xoán, repartidas ao serán tras varias sesións informativas.

O barrio de San Pedro volveu ser un dos epicentros da festa, cunha gran afluencia de público que se achegou á praza 8 de Marzo e á Cruz de San Pedro para gozar da fogueira e das tradicionais sardiñas, organizadas pola asociación ‘A Xuntanza’. Tamén houbo actividade intensa en zonas como Sar, Vista Alegre, Conxo, Fontiñas, Pelamios e San Lourenzo, con iniciativas promovidas por colectivos veciñais que incluíron xogos para nenos, música e churrasco.

A xornada estivo marcada tamén pola intensa actividade no Mercado de Abastos, onde os postos ofreceron sardiñas frescas procedentes das lonxas de Rianxo e Ribeira, a prezos que oscilaron entre os 10 e os 12 euros por quilo, dependendo da frescura. Tamén houbo oferta de churrasco, criollos, pan de millo e herbas aromáticas, preparadas para seren postas a remollo á luz da lúa, co fin de lavar a cara pola mañá segundo a tradición.

En total, 31 celebracións tiveron lugar en espazos públicos, das cales 12 incluíron tanto cacharela como sardiñada, 12 só a parte gastronómica e 7 só fogueiras. A isto sumáronse 587 notificacións de eventos en espazos privados, que contribuíron a que Santiago vivise unha noite intensamente participada e cun ambiente festivo que se prolongou ata ben entrada a madrugada.

O dispositivo de seguridade activado polo Concello incluíu reforzos da Policía Local, Nacional e do servizo de bombeiros, que non tiveron que intervir en incidentes destacados. A previsión meteorolóxica favorable e a organización previa das entidades veciñais e hostaleiras favoreceron o desenvolvemento dun San Xoán sen contratempos, a pesar de coincidir nun luns laborable.

Con máis de 50 celebracións ao longo da fin de semana e até o sábado seguinte, a festividade de San Xoán confirma unha vez máis a súa vixencia na capital galega, combinando gastronomía, simbolismo ancestral e participación comunitaria. O debate sobre a súa consideración como festivo local volveu rexurdir, nunha cidade onde cada ano medra a implicación veciñal arredor desta data sinalada do calendario galego.

ÚLTIMAS

Cine ao aire libre na Alameda: unha semana de lembranzas, comunidade e mocidade baixo as estrelas

Baixo as estrelas de Compostela, e agradecidos por unha noite sen choiva, moitísimas persoas,...

A illa de compostaxe do CIFP de Compostela culmina con éxito a súa primeira fase de funcionamento

A illa de compostaxe do Centro Integrado de Formación Profesional de Compostela xa tratou...

O CSIC crea un laboratorio pioneiro en Santiago para estudar a relación ancestral entre humanos e plantas

O Consello Superior de Investigacións Científicas (CSIC) avanza no seu proxecto 'PLANTCRAFT', que busca...

O persoal da limpeza do CHUS mobilízase contra Ilunion por vulnerar o contrato público

Decenas de traballadores do servizo de limpeza dos hospitais Clínico e Gil Casares de...

Cine ao aire libre na Alameda: unha semana de lembranzas, comunidade e mocidade baixo as estrelas

Baixo as estrelas de Compostela, e agradecidos por unha noite sen choiva, moitísimas persoas,...

A illa de compostaxe do CIFP de Compostela culmina con éxito a súa primeira fase de funcionamento

A illa de compostaxe do Centro Integrado de Formación Profesional de Compostela xa tratou...

O CSIC crea un laboratorio pioneiro en Santiago para estudar a relación ancestral entre humanos e plantas

O Consello Superior de Investigacións Científicas (CSIC) avanza no seu proxecto 'PLANTCRAFT', que busca...

LEAVE A REPLY

Please enter your comment!
Please enter your name here