Un estudo europeo sobre o consumo de drogas ilícitas a través da análise de augas residuais revela que, en Santiago de Compostela, descendeu a presenza de cocaína e cannabis con respecto ao ano anterior. Con todo, por primeira vez, detectouse ketamina nas augas analizadas, segundo os datos publicados este mércores polo grupo SCORE, en colaboración coa Axencia da Unión Europea sobre Drogas (EUDA).
O informe, que empregou mostras da depuradora da Silvouta, analiza o consumo medio diario de diferentes substancias na cidade e permite comparar a súa evolución ao longo do tempo.
Segundo os datos recollidos, o consumo medio de cocaína en Santiago en 2024 foi de 609,79 mg por cada 1.000 habitantes ao día, unha ligeira baixada en comparación cos 627,43 mg rexistrados en 2023. A análise tamén confirma que os sábados son o día da semana no que máis se consome esta droga, chegando a 783,42 mg/1000p/día.
No caso do cannabis, os datos indican unha media de 54,32 mg/1000p/día, mantendo tamén unha leve redución con respecto ao ano anterior. Como no caso da cocaína, o sábado foi o día con maior presenza desta sustancia nas augas residuais.
APARICIÓN DE KETAMINA E AUMENTO DE ANFETAMINAS
Un dos aspectos máis destacados do informe é a aparición da ketamina por primeira vez nas análises da depuradora compostelá, cunha media de 3,97 mg/1000p/día. Os datos revelan que os días de maior consumo desta substancia, que ten usos tanto médicos como recreativos, son os mércores e os xoves.
Por outra banda, a análise tamén reflicte un incremento no consumo de anfetaminas, que se situou nos 10,93 mg/1000p/día. O último dato dispoñible era de 2022, cando se rexistraron 8,35 mg/1000p/día, polo que se confirma unha tendencia ascendente. O sábado foi, novamente, o día no que se detectou un maior consumo desta droga estimulante.
METODOLOXÍA DO ESTUDO
O estudo forma parte do maior proxecto europeo de monitoreo do consumo de drogas mediante augas residuais, no que se analizaron mostras diarias recollidas entre marzo e maio de 2024. No total, a investigación abarcou augas residuais correspondentes a 68,8 millóns de persoas, co obxectivo de detectar trazas de cinco drogas estimulantes (anfetamina, cocaína, metanfetamina, MDMA/éxtase e ketamina), así como cannabis.
O informe permite coñecer as tendencias de consumo a nivel local e comparar Santiago con outras cidades europeas, ademais de ofrecer datos clave para a toma de decisións en materia de prevención e políticas de saúde pública.
