O voceiro do Grupo Municipal Socialista de Santiago, Gumersindo Guinarte, reclamou este luns ao Goberno local a reparación do ascensor do Centro Sociocultural da Trisca, un equipamento municipal no que, segundo denunciou, persisten desde hai anos problemas de accesibilidade que condicionan o uso das instalacións.
Guinarte advertiu de que o centro continúa sen unha solución efectiva para garantir o acceso aos seus diferentes andares, malia tratarse dun espazo público “de referencia para o barrio e para o conxunto da cidade de Santiago”. O representante socialista criticou que o executivo encabezado por Goretti Sanmartín non teña resolto unha situación que, segundo indicou, se prolonga “desde hai demasiado tempo”.
O principal problema sinalado polo PSdeG é o estado do ascensor, que, segundo lembrou Guinarte, “leva anos sen funcionar”. Esta circunstancia dificulta a participación nas actividades que se desenvolven nos andares superiores do centro sociocultural e afecta de maneira especial ás persoas con mobilidade reducida. Tamén repercute, segundo indicou o grupo socialista, nas familias con crianzas pequenas que acoden habitualmente a este equipamento municipal.
O voceiro socialista asegurou que a situación foi trasladada en numerosas ocasións pola veciñanza da Trisca, que reclama unha actuación para permitir que todas as persoas poidan empregar o centro en igualdade de condicións. Nese sentido, Guinarte defendeu que a accesibilidade debe ser unha prioridade na xestión dos espazos públicos municipais.
O PSdeG tamén lembrou que no pasado mes de xaneiro o concelleiro responsable dos centros socioculturais comunicara que se estaba a traballar nunha nova proposta para reparar o elevador. Porén, segundo Guinarte, “a día de hoxe este segue sen estar operativo”, unha situación que atribúe á falta de capacidade do Goberno municipal para resolver cuestións que afectan ao día a día da cidadanía.
Para os socialistas, non resulta aceptable que unha instalación municipal continúe arrastrando durante anos un problema que limita o acceso de parte da veciñanza. Guinarte insistiu en que a accesibilidade “non pode seguir sendo unha cuestión secundaria” para o executivo local e pediu unha intervención inmediata para desbloquear a situación.
