O líder do Partido Popular de Santiago, Borja Verea, levará ao Pleno municipal deste xoves unha proposta para retirar todos os radares situados no barrio de Conxo. Segundo explicou o portavoz popular, a súa formación aposta por eliminar estes dispositivos fronte á intención do goberno local de incrementar a súa presenza nas vías de acceso á cidade.
Verea asegurou que o executivo municipal, integrado por BNG e Compostela Aberta, pretende aumentar a recadación a través das multas de tráfico até duplicar os ingresos actuais, situándoos arredor dos cinco millóns de euros. Fronte a este escenario, o PP defende, segundo indicou, unha redución da presión fiscal e da recadación por sancións. “Nós queremos reducir impostos e recadación por multas”, afirmou.
O portavoz popular considerou que a compra e instalación de novos radares e vehículos móbiles de control de velocidade “responde a un afán recadatorio”, ao entender que non se acompañan previamente de medidas destinadas a moderar a velocidade nas vías afectadas. Neste sentido, lembrou que o propio goberno municipal fixera público recentemente que Santiago atravesa un dos mellores anos en materia de seguridade viaria, con menos accidentes e atropelos e sen puntos negros identificados.
Segundo expuxo Verea, existe unha contradición entre ese balance positivo e o anuncio posterior da colocación de máis radares. O líder do PP tamén recordou que a alcaldesa, Goretti Sanmartín, manifestara nas primeiras semanas do mandato a posibilidade de retirar o radar de Conxo, polo que reclamou explicacións sobre o cambio de criterio.
Na súa intervención, Verea insistiu en que, de non existir un obxectivo recadatorio, a alternativa sería reducir impostos como o IBI nunha contía equivalente ao incremento previsto das multas. Así mesmo, vinculou o aumento da recadación por sancións coa estrutura de persoal directivo e de asesoramento do goberno local, ao que acusou de incrementar estes postos ao inicio do mandato.
O portavoz popular sostivo que, se o goberno municipal quixese evitar unha maior carga económica sobre a cidadanía, debería buscar recursos noutras partidas orzamentarias. Pola contra, segundo afirmou, opta por incrementar as multas, instalar máis radares e elevar impostos, malia os datos positivos ofrecidos en materia de seguridade viaria.
