Tras 20 días de folga, as traballadoras e traballadores da empresa Beatriz Seijo SL mantéñense firmes nas súas demandas e agradecen o apoio recibido para sufragar a caixa de resistencia que lles permite continuar coa súa loita. Durante a concentración celebrada na mañá deste martes en Santa Marta leron un comunicado no que denuncian a postura da empresa, que consideran un desprezo á súa profesionalidade e unha “burla” á súa situación persoal.
O colectivo explicou que, tras unha semana sen respostas, recibiron unha contestación formal da dirección, representada por Bea e Bruno, e o seu asesor legal Óscar Rodríguez Mallo do Grupo Fisela, rexeitando todas as demandas presentadas o pasado 23 de setembro. As traballadoras interpretan esta resposta como unha estratexia para “vencelas por esgotamento” e indicaron que a empresa mantén unha postura de autoritarismo, negándose a negociar compromisos adquiridos anteriormente.
Entre as reivindicacións do comité de folga destacan a readmisión dunha traballadora despedida, o fin da relación laboral como falsa autónoma, unha suba salarial para equiparar o salario mínimo a condicións dignas, e a corrección das datas de alta das traballadoras fixas discontinuas. Tamén demandan reunións periódicas e a redución de ratios en aulas de cerámica, onde aseguran que os recursos e espazos son insuficientes.
As negociacións están rotas segundo o comité de folga, que asegurou que continuarán coas súas accións reivindicativas durante o mes de outubro. O apoio recibido durante estas tres semanas de mobilización foi clave, e as traballadoras expresaron o seu agradecemento ás persoas e colectivos que lles están a acompañar na súa loita: “Grazas por tanto!”.
