O BNG de Ames presentou unha moción instando á Xunta de Galicia a cumprir de inmediato coas ratios máximas establecidas na Resolución do 10 de xaneiro de 2024, da Dirección Xeral de Centros e Recursos Humanos. O grupo municipal demanda que os centros educativos conten co persoal de apoio e especialistas necesarios para garantir unha integración total do alumnado con necesidades especiais.
No caso concreto do CEIP de Ventín, o BNG esixe que se fornezan autobuses suficientes para o servizo de transporte escolar, evitando que haxa desdobres nas liñas, o que afecta o servizo prestado aos estudantes.
A voceira do BNG, Escarlata Pampín, destacou que “atopámonos ante un novo curso escolar de rebaixas por parte da Consellería de Educación que non imos permitir”. Pampín subliñou que o BNG está a apoiar as mobilizacións das ANPAS, profesorado e alumnado, ademais de levar esta problemática ao pleno municipal e ao Parlamento Galego.
Segundo anunciou Pampín, a deputada nacionalista Cristina Fernández visitará Ames este xoves para avaliar a situación e trasladar as demandas ao goberno da Xunta. Pampín reiterou o compromiso do BNG coa defensa dunha educación pública e de calidade para todo o alumnado.
