Os concelleiros do Partido Popular de Santiago, Adrián Villa e María Baleato, reuníronse onte con máis de 30 veciños e veciñas do barrio de Casas Novas para abordar a súa preocupación pola retirada da liña 9 de autobús urbano, que conectaba a Cidade da Cultura coa Praza de Galicia e o propio barrio. A eliminación deste servizo, que deixou á veciñanza sen transporte público durante todo o verán, foi cualificada polos edís populares como “un acto de tiranía” por parte do BNG.
A modificación do percorrido foi realizada, segundo denuncian os populares, “de forma autoritaria” e sen consultar cos afectados. María Baleato criticou que, a pesar de que a liña 4 foi supostamente redirixida para cubrir o percorrido de Casas Novas, “a realidade é que isto non está sucedendo”. Segundo a concelleira, a medida foi implementada “de forma informal, sen previo aviso e sen constancia na información que manexa TRALUSA”, a empresa encargada do servizo de autobuses.
Adrián Villa afondou na crítica, cualificando de “desleixo e falta de respecto” a actuación do BNG, que deixou ao barrio sen servizo de transporte en pleno verán e ante a proximidade do mes de setembro, cando se incrementa a necesidade de transporte para escolares e persoas maiores. “Os nacionalistas non cumpriron coa súa obriga de buscar as mellores alternativas para o transporte público mentres duraban as obras no Pombal”, afirmou Villa.
Os populares anunciaron que solicitarán formalmente a recuperación da liña 9 e instaron ao BNG a rectificar e a garantir un servizo de transporte público que, segundo Villa, foi eliminado de forma “opaca e improvisada”.
